“Shinjang” géziti “Shinjangni medeniyet bilen ‍ozuqlandurushni omumyüzlük chongqurlashturush” ni telep qildi

6-Iyun küni Uyghur aptonom rayonluq partkomning organ géziti bolghan “Shinjang” géziti we “Tengritagh” tori qatarliq taratqularda élan qilin'ghan bir maqalide, “Shinjangni medeniyet bilen ozuqlandurush” ni omumyüzlük chongqurlashturush telep qilin'ghan. Maqalide éytilishiche, “Istratégiyelik pilanlash we yuqiri qatlamliq layihileshni kücheytip, medeniyetning yönilishini tépip chiqish, ozuqlandurushning usul-charilirini tetbiqlash, shinjangning mol menisini chüshinish, shinjangni medeniyet bilen ozuqlandurushning her türlük xizmetlirini jayida emeliyleshtürüsh kérek” iken.

Uyghur élining weziyitidin xewerdar analizchilarning éytishiche, b d t kishilik hoquq aliy komissari mishél bachélét ‍ötken hepte Uyghur élide ziyarette bolup, arqidinla “Shinjang géziti” ning bu meqalini élan qilishi diqqet qozghaydiken. Analizchilar, bachélétning ziyaritidin kéyinla “Shinjang géziti” ning “Shinjangni medeniyet bilen ‍ozuqlandurush” ni omumiy yüzlük chongqurlashturush toghrisida kona muqamni qayta towlishi, uning bu ziyarettin ongushluq atlap ötkenlikini körsitidu, dep qarashqan. Bezi gherb döletliri, xelq'ara kishilik hoquq teshkilatliri we muhajirettiki Uyghurlar bachélétning ziyaritige qarshi chiqqan. Ular bu shara'itta xitayning b d t xadimlirini aldap yolgha sélip qoyidighanliqini agahlandurghanidi.

Maqalide, “Shinjangni medeniyet bilen ozuqlandurush qurulushining uzun muddetlik istratégiye, saghlam asas sélish, uzun mezgillik bixeterlik berpa qilishning négizlik tedbiri” ikenliki, “Shinjangni medeniyet bilen ozuqlandurush qurulushini omumiyüzlük chongqur emeliyleshtürüshte muhim yönilishke kapaletlik qilish, idé'ologiye xizmitining rehberlik hoquqi, ‍aktipchanliq hoquqi, söz qilish hoquqigha mehkem ige bolushimiz kérek” déyilgen. “Shinjang” gézitining maqaliside éytilishiche, “Shinjangni medeniyet bilen ozuqlandurush bir xil murekkep sistéma qurulushi” iken.