ئۇيغۇر رايونىدا ئۇيغۇرلارنىڭ تۇرمۇشى ئەكس ئەتتۈرۈلگەن ئەدەبىي ئەسەرلەر غايىب بولماقتا

مۇخبىرىمىز ئەركىن
2019-04-26
ئېلخەت
پىكىر
Share
پرىنت

ئۇيغۇر ئاپتونوم رايونلۇق ئەدەبىيات سەنئەتچىلەر بىرلەشمىسى يېقىندا ئېلان چىقىرىپ، خىتاي تىلىدا «مەن ۋە مېنىڭ ۋەتىنىم» ناملىق ئەسەر يېزىش ھەرىكىتى قوزغىغان.

«شىنجاڭ گېزىتى» نىڭ 25‏-ئاپرېل خەۋەر قىلىشىچە، مەزكۇر ھەرىكەت خىتاي خەلق جۇمھۇرىيىتى قۇرۇلغانلىقىنىڭ 70 يىللىقىنى تەبرىكلەش نامىدا ئېلىپ بېرىلىدىكەن. بۇ پائالىيەت خىتاي مەركىزى تەشۋىقات بۆلۈمى، خىتاي ئەدەبىيات-سەنئەتچىلەر بىرلەشمىسى ۋە يازغۇچىلار جەمئىيىتى قاتارلىق ئورگانلارنىڭ تەشەببۇسى بىلەن باشلانغان بولۇپ، «تارىم»، «غەربىي دىيار»، «شۇغىلا» «شىنجاڭ قىرغىز ئەدەبىياتى» قاتارلىق ژۇرناللار ئەسەر قوبۇل قىلىش ئېلانى چىقارغان. «غەربىي دىيار» ژۇرنىلى 4 دەرىجىلىك مۇكاپات تەسىس قىلىپ، ئەسەر قوبۇل قىلىشقا باشلىغان. كۆزەتكۈچىلەرنىڭ ئىلگىرى سۈرۈشىچە، ئەمەلىيەتتە بۇ ھەرىكەت مەزكۇر رايونىدا ئۇيغۇر تۇرمۇشى تېما قىلىنغان ئەدەبىي ئەسەرلەرنىڭ يوقىتىلىۋاتقانلىقىنى كۆرسىتىدىكەن.

خىتاي ھۆكۈمىتى 2017‏-يىلى 2‏-ئايدىن باشلاپ ئۇيغۇرلارنى كەڭ كۆلەمدە تۇتقۇن قىلىشى ئۇيغۇر نەشرىياتچىلىقىغا قاتتىق تەسىر كۆرسەتكەن. رايوندىكى نەشرىياتلاردا ئۇيغۇرچە ئەسەرلەرنى نەشر قىلىنىشى، بەزى ئۇيغۇرچە ژۇرنال ۋە گېزىتلەرنىڭ نەشرى پۈتۈنلەي توختىغان. بۇ جەرياندا بىر قىسىم نەشرىيات ۋە گېزىت-ژۇرناللارنىڭ تەھرىر ۋە مەسئۇللىرىنىڭ تۇتقۇن قىلىنغانلىقى مەلۇم بولغان.

«شىنجاڭ خەلق نەشرىياتى» تور بېتىدىن مەلۇم بولۇشىچە، مەزكۇر ئورۇن 2017‏-يىلدىن بېرى ھېچقانداق ئۇيغۇرچە كىتاب نەشر قىلىپ باقمىغان. «شىنجاڭ گېزىتى» نىڭ خەۋىرىدە قەيت قىلىنىشىچە، خىتاي خەلق جۇمھۇرىيىتىنىڭ 70 يىللىقىغا بېغىشلىنىدىغان بۇ ئەسەرلەردە شى جىنپىڭنىڭ «ئەدەبىيات سەنئەت خىزمىتى توغرىسىدىكى نەزەرىيەسى ۋە يوليورۇقىنىڭ روھى ئەكس ئەتتۈرۈلۈشى، شەخس بىلەن دۆلەتنىڭ مۇناسىۋىتىنى كۆرۈنۈش قىلىنىشى، كومپارتىيە رەھبەرلىكىدە دۆلەتنىڭ قولغا كەلتۈرگەن نەتىجىسى نامايان قىلىنىشى، خىتاي خەلقىنىڭ بەختلىك تۇرمۇشنى قوغلىشىش كۈرىشىدىكى روھىي قىياپىتى يورۇتۇپ بېرىلىشى، بولۇپمۇ شىنجاڭدا يۈز بەرگەن تارىخىي ئۆزگىرىشنىڭ نامايان قىلىنىشى» تەلەپ قىلىنغان. شۇنىڭدەك يەنە قوبۇل قىلىنىدىغان بۇ ئەسەرلەرنىڭ چوقۇم دۆلەت ئورتاق قوللىنىدىغان تىلدا، يەنى خىتاي تىلىدا يېزىلىشى شەرت قىلىنغان.

كۆزەتكۈچىلەرنىڭ ئىلگىرى سۈرۈشىچە، بۇ ھەرىكەت ئۇيغۇرلارنىڭ مىللىي ئەدەبىيات زەۋقىنى يوقىتىپ، ئۇنىڭ ئورنىغا خىتاي تىل-يېزىق ئەدەبىياتىنى دەسسىتىشنى مەقسەت قىلماقتا ئىكەن.

پىكىرلەر (0)
Share
تولۇق بەت