Уйғур районида уйғурларниң турмуши әкс әттүрүлгән әдәбий әсәрләр ғайиб болмақта

Мухбиримиз әркин
2019-04-26
Елхәт
Пикир
Share
Принт

Уйғур аптоном районлуқ әдәбият сәнәтчиләр бирләшмиси йеқинда елан чиқирип, хитай тилида «мән вә мениң вәтиним» намлиқ әсәр йезиш һәрикити қозғиған.

«Шинҗаң гезити» ниң 25‏-апрел хәвәр қилишичә, мәзкур һәрикәт хитай хәлқ җумһурийити қурулғанлиқиниң 70 йиллиқини тәбрикләш намида елип берилидикән. Бу паалийәт хитай мәркизи тәшвиқат бөлүми, хитай әдәбият-сәнәтчиләр бирләшмиси вә язғучилар җәмийити қатарлиқ органларниң тәшәббуси билән башланған болуп, «тарим», «ғәрбий дияр», «шуғила» «шинҗаң қирғиз әдәбияти» қатарлиқ журналлар әсәр қобул қилиш елани чиқарған. «Ғәрбий дияр» журнили 4 дәриҗилик мукапат тәсис қилип, әсәр қобул қилишқа башлиған. Көзәткүчиләрниң илгири сүрүшичә, әмәлийәттә бу һәрикәт мәзкур районида уйғур турмуши тема қилинған әдәбий әсәрләрниң йоқитиливатқанлиқини көрситидикән.

Хитай һөкүмити 2017‏-йили 2‏-айдин башлап уйғурларни кәң көләмдә тутқун қилиши уйғур нәшриятчилиқиға қаттиқ тәсир көрсәткән. Райондики нәшриятларда уйғурчә әсәрләрни нәшр қилиниши, бәзи уйғурчә журнал вә гезитләрниң нәшри пүтүнләй тохтиған. Бу җәрянда бир қисим нәшрият вә гезит-журналларниң тәһрир вә мәсуллириниң тутқун қилинғанлиқи мәлум болған.

«Шинҗаң хәлқ нәшрияти» тор бетидин мәлум болушичә, мәзкур орун 2017‏-йилдин бери һечқандақ уйғурчә китаб нәшр қилип бақмиған. «Шинҗаң гезити» ниң хәвиридә қәйт қилинишичә, хитай хәлқ җумһурийитиниң 70 йиллиқиға беғишлинидиған бу әсәрләрдә ши җинпиңниң «әдәбият сәнәт хизмити тоғрисидики нәзәрийәси вә йолйоруқиниң роһи әкс әттүрүлүши, шәхс билән дөләтниң мунасивитини көрүнүш қилиниши, компартийә рәһбәрликидә дөләтниң қолға кәлтүргән нәтиҗиси намаян қилиниши, хитай хәлқиниң бәхтлик турмушни қоғлишиш күришидики роһий қияпити йорутуп берилиши, болупму шинҗаңда йүз бәргән тарихий өзгиришниң намаян қилиниши» тәләп қилинған. Шуниңдәк йәнә қобул қилинидиған бу әсәрләрниң чоқум дөләт ортақ қоллинидиған тилда, йәни хитай тилида йезилиши шәрт қилинған.

Көзәткүчиләрниң илгири сүрүшичә, бу һәрикәт уйғурларниң миллий әдәбият зәвқини йоқитип, униң орниға хитай тил-йезиқ әдәбиятини дәсситишни мәқсәт қилмақта икән.

Пикирләр (0)
Share
Толуқ бәт