«Британийәлик йәһудийлар вәкилләр мунбири» әнглийә һөкүмитини уйғурлар үчүн һәрикәткә өтүшкә чақирди

Мухбиримиз ирадә
2020-02-18
Елхәт
Пикир
Share
Принт

Уйғурларниң мәсилисини йеқиндин қоллап келиватқан йәһудий тәшкилатлиридин болған «британийәлик йәһудийлар вәкилләр мунбири» әнглийә һөкүмитини уйғурлар үчүн һәрикәткә өтүшкә чақирди.

18-Феврал күни «британийәлик йәһудийлар вәкилләр мунбири» ниң муавин башлиқи әдвин шукер әнглийә һөкүмитиниң дин вә етиқад әркинликигә мәсул алаһидә әлчиси рәхман чештиға имзалиқ мәктуп йоллаш арқилиқ, әнглийә һөкүмитигә уйғурларниң хәтәрлик вәзийитигә көңүл бөлүш һәққидә чақириқ қилған.

Әдвин шукир әпәнди әнглийә һөкүмитиниң дини етиқад алаһидә әлчисигә йоллиған мәктупида уйғур елидә нөвәттә йолға қоюлуватқан лагер вә мәҗбурий әмгәк түзүми, дини вә миллий кимликиниң бастурулуши, уйғурларниң әң түпки һоқуқлириниң дәпсәндә қилинишидәк мәсилиләрни тәпсилий тонуштуруп «биз әнглийә һөкүмитини өзиниң бирләшкән дөләтләр тәшкилати вә башқа органлардики орнидин пайдилинип туруп, уйғурларниң мәсилисини хәлқаралиқ сорунларда оттуриға қоюшқа шундақла хитай һөкүмитидин сорашқа чақиримиз» дегән.

Әнглийә һөкүмитиниң дини етиқадқа мәсул алаһидә әлчиси, парламент әзаси рәхман чештигә йолланған мәктупта йәнә, 17-феврал күни хитайниң лагерларға аит ашкариланған йәнә бир муһим һөҗҗити болған «қарақаш һөҗҗәтлири» һәққидиму мәлумат берилгән. Әдвин шукир мәктупида әнглийә һөкүмитидин бу мәсилә һәққидә немә ишларни қилишни ойлишиватқанлиқи һәққидә өзлиригә мәлумат беришини сорап: «биз бу һәқтики мәлуматларни биз билән һәмкарлишиватқан уйғур җамаити билән ортақлишишни халаймиз» дегән.

Уйғурларниң мәсилиси нөвәттә америка вә явропадики йәһудий тәшкилатлири бирдәк көңүл бөлүватқан мәсилигә айлиниватқан болуп, йеқинда йәнә «явропа иттипақи йәһудий оқуғучилар уюшмиси», «германийә йәһудий оқуғучилар уюшмиси» вә «әнглийә йәһудий оқуғучилар уюшмиси» қатарлиқ тәшкилатларму ортақ баянат елан қилип, хитай һөкүмитиниң уйғурларға йүргүзүватқан мәдәнийәт қирғинчилиқини әйиблигән.

Юқиридики бу тәшкилатлар нөвәттә дуня уйғур қурултийи билән зич һәмкарлишип, уйғурлар мәсилисидә актип һәрикәт қилмақтикән.

Пикирләр (0)
Share
Толуқ бәт