Irélandiyelik diniy rehberler xitayning Uyghurlargha qiliwatqan ziyankeshlikini eyiblidi

Muxbirimiz irade
2021-02-18
Share

Irélandiyelik diniy rehberler xitay hökümitining Uyghurlargha qiliwatqan ziyankeshlikini eyiblep bayanat élan qilghan.

50 Tin artuq diniy rehberning imza qoyushi bilen élan qilin'ghan bayanatta mundaq diyilgen: "Irélandiyediki diniy étiqadni asas qilghan guruppilarning diniy dahiyliri we rehberliri bolush süpitimiz bilen, biz en'giliye we bashqa jaylardiki kesipdashlirimiz bilen birliship, insaniyetning izzet-hörmitining hemme kishige ortaq ikenlikini, xitaydiki Uyghurlar we bashqa musulmanlargha yürgüzüliwatqan yehudiy qirghinchiliqidin buyanqi eng qebih insaniy paji'elerning birini we hetta irqiy qirghinchiliq éhtimalini yorutup bérish arqiliq tekitlimekchimiz."

"Irélandiye waqti géziti" ning xewer qilishiche, bayanatqa imza qoyghuchilar irélandiye chérkawining bash popi, dublindin maykél jékson؛ besh katolik épiskopi-alan makgukyan, fintan monagan, larri daffi, fonsi kullinan we lé'o orili؛ dublin ibraniylar jama'itining rabbi zalman؛ irélandiye musulmanlar tinchliq we birlik kéngishidiki sheyx ömer el-qadiri we zén budda dini jem'iyitining bashliqi kilroy qatarliq muhim dini rehberlernimu öz ichige alidiken.

Yuqiriqi bu diniy rehberler bayanatida Uyghurlarning yigha-zarisi diqqetke élinmisa we ziyankeshlik qilghuchi jazalanmay, uning zulumni dawamlashturushigha yol qoyuluwerse, u halda buning xelq'ara jem'iyetning kishilik hoquqni qoghdash iradisige guman peyda qilidu, dep tekitligen. Ular bayanatida yene: "Xitay da'irilirining éniq meqsiti Uyghurlarning kimlikini yoqitish. Diniy rehber bolush süpitimiz bilen biz pa'aliyetchimu emes, siyasetchimu emes. Yehudiy chong qirghinchiliqidin kéyin, dunya 'qayat tekrarlanmaydu' dégen wedige ishen'gen. Emma bügün biz 'qayta tekrarlanmaydu' dégen sözlerni qayta-qayta tekrarlawatimiz," dégen.

Axirida bu dini rehberler özlirining Uyghurlar hem shundaqla xitaydiki bashqa barliq din we étiqad qurbanliri bilen bir septe turidighanliqini tekitligen. Ular dunya jama'etchilikidin "Bu jinayetlerni tekshürüsh, mes'uliyetni sürüshtürüsh we insaniy qedir-qimmetni eslige keltürüsh yoli berpa qilish" ni telep qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet