Д у қ вәкили: «биз б д т вә дуня сәһийә тәшкилатиниң уйғур районида тәкшүрүш елип беришини тәләп қилимиз»

Мухбиримиз әркин
2020-03-09
Елхәт
Пикир
Share
Принт

Дуня уйғур қурултийиниң вәкили б д т кишилик һоқуқ кеңишиниң 43‏-нөвәтлик йиғинида сөз қилип, хитайниң лагерларни тақиши, лагерлардики милйонлиған бигунаһ тутқунларни қоюп бериши, шундақла б д т вә дуня сәһийә органлириниң уйғур районида чәклимисиз тәкшүрүш елип беришиға йол қоюшини тәләп қилған.

Дуня уйғур қурултийиниң вәкили зумрәтай әркин б д т кишилик һоқуқ кеңишиниң 9‏-март күни җәнвәдә өткүзүлгән йиғинида германийә «тәһдит астидики хәқләр җәмийити» гә вакалитән сөз елип, юқириқи чақириқни оттуриға қойған.

Б д т кишилик һоқуқ кеңишиниң бу нөвәтлик йиғини 24‏-феврал башланған. Зумрәтай әркин йиғинда «хитай һөкүмити вә хәлқара җәмийәтниң инсан һаятини сиясәт вә йүз хатиридин үстүн орунға қоюши керәклики» ни тәкитләп, «лагерларни тақашқа, халиғанчә тутқун қилинған милйонлиған бигунаһ кишиләрни қоюп беришкә, б д т вә хәлқара сәһийә органлириниң кечикип қелиштин бурун районда чәклимисиз тәкшүрүш елип беришиға йол қоюшқа чақиримиз» дегән.

У, хитай һөкүмити лагердики тутқунлар қоюп берилди, дәп елан қилған болсиму, лекин дәлилләр тутқунларниң карханиларда мәҗбурий әмгәккә селиниватқанлиқини көрситип бәргәнлики, шундақла корона вирусиниң лагерлардики милйонлиған уйғур вә башқа мусулманларға хәвп йәткүзүватқанлиқидин қаттиқ әндишә қиливатқанлиқини әскәртип, хәлқара җәмийәтниң бу кризисқа көрсәткән инкасидин қаттиқ үмидсизләнгәнликини тәкитлигән. Б д т кишилик һоқуқ кеңишиниң җәнвәдә өткүзүлүватқан мәзкур йиғини 20‏-мартқа қәдәр давамлишиду.

Пикирләр (0)
Share
Толуқ бәт