Вакаләтсиз милләтләр тәшкилати: хитайниң мәдәнийәт зор инқилаби шәрқи түркистанда уйғурларға қайтидин һуҗум қилди

Мухбиримиз шөһрәт һошур
2019-03-26
Елхәт
Пикир
Share
Принт

Уйғур кишилик һоқуқ қурулуши түнүгүн өз тор бетидә уйғур районида йеқинқи 2 йил ичидә тутқун қилинған 338 нәпәр зиялий һәққидә доклат елан қилған иди.

Бүгүн вакаләтсиз милләтләр тәшкилати бу доклат һәққидә мәхсус бир тонуштуруш мақалиси елан қилди. Мақалә «хитайниң мәдәнийәт зор инқилаби шәрқи түркистандики уйғур хәлқигә қайтидин һуҗум қилди» дегән мавзуда берилди.

Инсанийәт тарихидики әң чоң апәтләрдин һесабланған хитайниң мәдәнийәт зор инқилабиниң илгири 5000 йиллиқ хитай мәдәнийитини битчит қилғанлиқи, әмдиликтә бу апәтлик һәрикәтниң әйни шәкилдә уйғур хәлқигә қарита давамлишиватқанлиқи әскәртилди.

Мақалидә уйғур кишилик һоқуқ қурулушиниң 2018-йили 10 айда бир қетим доклат елан қилип 231 нәпәр тутқундики зиялийниң әһвалидин мәлумат бәргәнлики; аридин узун өтмәй йәни алдинқи күни йеңидин толуқланған 107 киши билән қетип җәмий 338 кишиниң кимлики вә иш-излири һәққидә мәлумат бәргәнлики тилға елинған.

Мақалидә уйғур җәмийитиниң илмий вә иҗтимаий һаятида көзгә көрүнгән вә йетәкчи рол ойнап кәлгән бу кишиләрниң сотсиз вә муддити ениқсиз һалда тутуп турулуватқанлиқи әскәртилди.

Мақалида йәнә елан қилинғанларниң тутқундики зиялийлардин пәқәт чәтәлгә ашкариланғанлири йәни тутқундики омуми зиялийлар саниниң аз бир қисмини тәшкил қилидиғанлиқи билдүрүлди.

Вакаләтсиз милләтләр тәшкилати б д т да көзәткүчилик орни болған, хәлқарадики нопузлуқ тәшкилатлардин биридур.

Пикирләр (0)
Share
Толуқ бәт