Xitay hökümiti bezi gherb döletlirining Uyghur mesilisini muzakire qilish telipini ret qilghan

Muxbirimiz erkin
2018-05-17
Élxet
Pikir
Share
Print

Xitay hökümiti kanada qatarliq bezi gherb döletlirining "Shinjang mesilisi" we Uyghur musulmanlirining ehwaligha alaqidar mesililerni muzakire qilish telipini ret qilghan.

Kanadada chiqidighan "Yer shari we pochta géziti" ning 16‏-may küni ashkarilishiche, kanada, firansiye, gérmaniye, shwétsariye qatarliq gherb döletlirining bir guruppa diplomatliri xitay hökomiti bilen Uyghur rayonigha alaqidar mesililer heqqide söhbet ötküzüshni telep qilghan. Emma xitay hökümiti gherb diplomatlirining bu telipini ret qilghan.

"Yer shari we pochta géziti" ning maqaliside chet'el diplomatlirining bashqa dölet hökümetliridin bundaq teleplerde bolushining normal diplomatik qa'ide ikenliki, hökümetlerning bundaq diplomatik teleplerni ret qilishining nahayiti az uchraydighanliqi eskertilip, "Halbuki, xitayda bundaq diplomatik teleplerni ret qilish ishlirining köp yüz béridighandighanliqi" ni tekitligen.

Xitayda bundaq ehwal ötken yi'ili bir qétim yüz bergen idi. Ötken yili 11 gherb döliti xitaygha mektup yollap, xitayda tutqun qilin'ghan adwokat we kishilik hoquq qoghdighuchilirigha ten jaza bérish, gheyriy insaniy mu'amilide bolush yaki jazalash qilmishlirigha da'ir xewerlerdin qattiq endishe qiliwatqanliqini bildürgen. Lékin xitay da'iriliri bu mektupni igilirige qayturup bergen.

"Yer shari we pochta géziti" ning ashkarilishiche, gherb diplomatliri xitay hökümiti bilen uyghürlarning ehwali toghriliq sözlishish telipini bu yilning bashlirida otturigha qoyghan. Lékin maqalida xitayning buninggha da'ir tenqidlerni izchil ret qilip kéliwatqanliqi, kanada wekili b d t kishilik hoquq kéngishining bu yil 3‏-aydiki yighinida minglighan Uyghurlarning "Yépiq terbiyelesh lagérliri" gha solan'ghanliqini otturigha qoyghan bolsimu, lékin xitay wekilining ret qilghanliqini otturigha qoyghan. Maqalida yene Uyghur aptonom rayonidiki "Yépiq terbiyelesh merkezliri" ning qurulushi, rémont qilining ehwali we kéngeytilishige 138 milyon dollar ajritilghanliqi, buning gérmaniyelik tetqiqatchi adri'an zénzning yéqinda élan qilin'ghan bir doklatida otturigha qoyulghanliqini bildürgen.

Toluq bet