Америка һөкүмити вә америка дөләт мәҗлиси уйғур мәсилисидә дәрһал һәрикәткә өтүшкә чақирилди

Мухбиримиз ирадә
2019-05-23
Елхәт
Пикир
Share
Принт

Хитай һөкүмитиниң уйғур елидә йүргүзүватқан зулумиға қарши дәрһал әмәлий һәрикәт қоллиниш һәққидики чақириқлар күчәймәктә.

Америкадики «хәвәрләр һәптилики» журнилида мухбир тара франчис чан тәрипидин елан қилинған мақалидә дәл бу нуқта тәкитләнгән.

Мақалидә хитай һөкүмитиниң америкадики яш уйғур паалийәтчи фирқәт җәвдәт қатарлиқлардин уларниң паалийәтлири үчүн өч еливатқанлиқи, уйғур елидики лагерлардин зор бир қисминиң хитай өлкилиридики алаһидә түрмиләргә мәхпий һалда йөткәлгәнликидәк пакитлар мисал қилинип, америка һөкүмити бу мәсилидә конкрет тәдбир алмай өтүватқан һәрбир күндә уйғурлар вәзийитиниң еғирлишип меңиватқанлиқи тәкитләнгән.

Мақалә үчүн әнглийәдики невкасл университетиниң оқутқучиси, уйғуршунас җоанна симис ханим вә қатардики җорҗ товн университетиниң оқутқучиси макс ойдмән қатарлиқ мутәхәссисләр зиярәт қилинған. Мутәхәссисләрму бирдәк америкадики демократчилар вә җумһурийәтчиләр партийәлириниң әзалирини бирдәк уйғур елидики лагирлар мәсилисидә хитай билән болған тиҗарий мәсилиләрни бир чәткә қайрип қоюп туруп, җиддий тәдбир елиши керәкликини тәкитлигән.

Җоанна симис ханим сөзидә «америка әгәр бу мәсилидә кәскин һәрикәт қолланмайдикән, хитай компартийәсиниң мәсхирисигә қалиду» дегән. У уйғур елидә давам қиливатқан бу еғир зулумниң иқтисадтин, тиҗарәттин, пулдин муһимлиқини қайта-қайта тәкитлигән.

Юқириқи бу мақалидә йәнә уйғур елидә лагерлар йолға қоюлуп 3 йилдин кейин америка дөләт мудапиә министирлиқиниң уни адәттә натсистларниң йәһудийлар үчүн қурған лагерлири үчүн қоллинилидиған «йиғивелиш лагери» дегән аталғуни ишләткәнлики вә тутқунлар санини 3 милйон дәп җакарлиғанлиқи тилға елинған.

Пикирләр (0)
Share
Толуқ бәт