Әнглийә хитайни уйғурларниң кишилик һоқуқини еғир вә қорқунчлуқ дәриҗидә дәпсәндә қилиш билән әйиблиди

Мухбиримиз әркин
2020-07-20
Елхәт
Пикир
Share
Принт

Әнглийә ташқи ишлар министири доминик рааб хитайни уйғурларниң кишилик һоқуқини «еғир вә қорқунчлуқ» дәриҗидә дәпсәндә қилиш билән тәнқидләп, буниңда җавабкарлиқи бар шәхсләрни җазалашни чәткә қақмайдиғанлиқини билдүргән. У бу сөзләрни 19-июл BBC ниң зияритини қобул қилғанда тәкитлигән. BBC Ниң хәвәр қилишичә, доминик рааб йәнә уйғурларни мәҗбурий туғмас қилиш вә кәң көләмдә җазалаш тоғрисидики доклатлар «узундин бери көрүлүп бақмиған ишларни әслитиду» дегән.

Униң тәкитлишичә, әнглийә буниңға қарши мувапиқ тәдбир қоллиниш үчүн иттипақдаш дөләтләр билән биргә ишләйдикән. Доминик рааб бу сөзләрни хитайниң әнглийәдә турушлуқ баш әлчиси лю шавмиң BBC ниң зияритини қобул қилип, лагерларни рәт қилишниң алдида тәкитлигән. Лю шавмиң BBC мухбириға лагерлар һәққидики сөзләрни «сахта» дәп әйиблигәниди. Доминик рааб, әнглийәниң хитай билән яхши мунасивәт қурушни арзу қилидиғанлиқи, лекин уйғурларни мәҗбурий туғмас қилиш, кәң көләмлик лагерларға қамаш һәққидики хәвәрләргә қарап турмайдиғанлиқини билдүргән.

У «бу йәрдә еғир вә қорқунчлуқ кишилик һоқуқ дәпсәндичиликиниң йүз бериватқанлиқи ениқ. Биз бу тоғрисида хәлқара иттипақдашлиримиз билән ишләватимиз. Бу кишини интайин чоңқур әндишигә салиду» дегән. Лекин доминик рааб хитайниң уйғурларға тутқан муамилиси ирқий қирғинчилиққа кирәмду, дегән соалға җаваб бәрмигән. Униң тәкитлишичә, «хәлқара җәмийәт бу хил сөзни ишләткәндә диққәт қилиши керәк» икән.

Пикирләр (0)
Share
Толуқ бәт