Амазон, алма, фейсбук вә гугул ширкәтлири уйғурларға йүргүзүлүватқан мәҗбурий әмгәккә қарши туридиғанлиқини билдүрди

Мухбиримиз ирадә
2020-07-30
Елхәт
Пикир
Share
Принт

Американиң амазон, алма, фейсбук вә гугул қатарлиқ 4 чоң гигант ширкитиниң иҗраийә әмәлдарлири (CEO) 29-июл күни америка дөләт мәҗлисидә юқириқи бу ширкәтләрниң һәқсиз риқабәт, учурни қамал қилиш, қолланғучи учурлирини қалаймиқан ишлитиш қатарлиқ бир қатар мәсилилири бойичә дөләт мәҗлис әзалириниң соаллириға җаваб бәрди.

Мәзкур гуваһлиқ бериш йиғинида улар дөләт мәҗлиси әзалириниң күчлүк вә қейин соаллириға дуч кәлди вә у һәқтә чүшәнчә бәрди. Шулар қатарида уйғурларға иҗра қилиниватқан мәҗбурий әмгәк мәсилисиму бар болуп, улар йиғинда хитайдики мәҗбурий әмгәккә қәтий қарши туридиғанлиқи вә мәҗбурий әмгәк асасида ишләп чиқирилған һәрқандақ мәһсулатни алмайдиғанлиқи һәққидә вәдә бәрди.

Йиғинда америка авам палата әзаси кән бак хитай һөкүмитиниң уйғур мусулманлириға қаратқан мәҗбурий әмгәк вә яки қул әмгикидин пайда еливатқан 80 дин артуқ хәлқаралиқ ширкәт барлиқини, бу сәвәблик алдинқи һәптә америка дөләт мәҗлисидә америка шеркәтлирини мәҗбурий әмгәк асасидики тәминләш зәнҗирлиридин чәкләш һәққидә бир қанун лайиһәси тонуштурулғанлиқини баян қилди вә юқириқи ширкәт башлиқлиридин «силәр өзүңларниң мәҗбурий әмгәккә бағлинишлиқ болған малларни ишләтмәйдиғанлиқиңларға капаләтлик қилаламсиләр?» дәп сориди. Буниңға юқириқи әмәлдарларниң һәрбири айрим-айрим һалда өз ширкәтлириниң буниңға қәтий қарши туридиғанлиқини вә һәргиз мәҗбурий әмгәктин мал тәминлимәйдиғанлиқи һәққидә вәдә бәрди.

Мәлум болушичә, америка дөләт мәҗлисидә юқириқи гуваһлиқ бериш йиғини өткүзүлүватқанда бир қисим тибәт вә уйғур яшлири бирликтә намайиш қилип, юқириқи ширкәтләрниң хитай билән болған һәмкарлиқиға наразилиқ билдүргән.

Пикирләр (0)
Share
Толуқ бәт