Шелдон стон: “мән уйғурларниң немиси?”

Мухбиримиз әзиз
2020.08.12

Ғәрб дунясида уйғурлар дуч келиватқан паҗиәләр “қирғинчилиқ” дәп атиливатқанда ‍әнглийәдики “дөләтлик сақлиқ мулазимити” ниң пенсийәгә чиққан хадими, дохтур шелдон стон 11-авғуст күни “йәһудийлар қирғинчилиқи хатириси” тор бетидә мақалә елан қилип, өзиниң немә үчүн уйғурларни қоллаватқанлиқи һәққидә чүшәнчә бәрди.

Шелдон стон өйидики су йолини ремонт қилишқа кәлгән ишчиниң “әпәндим, уйғурлар сизниң немиңиз болиду? әҗәб мушу күнләрдә уйғур, уйғур дәп олтуралмайла қеливатисиз?” дегән соалиға җаваб тәриқисидә бу мақалини язғанлиқини алаһидә тәкитләш билән биргә нөвәттә милйонларчә ‍уйғур лагерларға қамалғанлиқини, әйни вақитта өзиниң ата-бовилири натсистларниң лагерлирида қандақ қисмәтләргә дуч кәлгән болса уйғурларниңму һазир шундақ паҗиәгә дуч келиватқанлиқини, дуня бу ишларға сүкүт қиливатқанлиқи үчүн өзиниң көкрәк керип оттуриға чүшкәнликини баян қилиду.

У мақалисиниң ахирида “әмди қайтиланмайду” дегән тарихий шоар еғир хирисларға дуч келиватқан әһвалда әнглийәдики кишиләргә улар қилалайдиған үч түрлүк ишни тәвсийә қилиду. У тәвсийә қилған “парламент әзалириға уйғурлар мәсилиси һәққидә мәктуп йезиш”, “уйғурларниң мәҗбурий әмгики бәдилигә пүткән мәһсулатларни байқут қилиш” вә “‛уйғур қирғинчилиқиға хатимә берәйли‚ намидики паалийәткә ианә қилиш” дегән тәклипләр дәсләпки қәдәмдә қоллашқа еришмәктикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.