«Вашингтон почтиси» гезитиниң баш мақалиси: «биз бу рәһимсизләрчә етник тазилашқа қарап туралмаймиз»

Мухбиримиз шөһрәт һошур
2018-08-15
Елхәт
Пикир
Share
Принт

Бүгүн, йәни 15-авғуст күни «вашингтон почтиси» гезитиниң тәһрирати баш мақалә елан қилип, нөвәттә уйғур диярида давам қиливатқан еғир вәзийәт һәққидә позитсийә ипадилигән.

«Биз бу рәһимсизләрчә етник тазилашқа қарап туралмаймиз» дәп мавзу қоюлған бу баш мақалида уйғур аптоном районида 18 айдин буян бир милйондин артуқ кишиниң лагерларға соланғанлиқи, хитай һөкүмитиниң буни интайин мәхпий йосунда елип барғанлиқи, әпсуслинарлиқи дуняниң бу мәсилигә нисбәтән анчә диққәт қилмиғанлиқи вә сус инкас қайтурғанлиқи тилға елинған.

Мәзкур баш мақалидә тегишлик җазаға тартилмиған хитайниң бу қилмишлириниң ахири б д т да соалға дуч кәлгәнлики вә хитай һөкүмитиниң тунҗи қетим бу һәқтә җаваб беришкә мәҗбур болғанлиқи әскәртилгән. Башқа мақалида йәнә хитай вәкилләр өмикиниң худди тәхмин қилинғандәк уйғур диярида бу хил лагерларниң мәвҗутлуқини инкар қилғанлиқи илгири сүрүлгән.

Мақалидә хитайниң уйғурларға қарита елип бериливатқан етник тазилаш вә бастуруш қилмишлириниң әмәлийәттә бермадики роһинга мусулманлириға қарита елип берилған бастурушлардин қелишмайдиғанлиқи алаһидә әскәртилгән.

«Вашингтон почтиси» гезитидә елан қилинған бу баш мақалидә йәнә президент трампниң америкилиқлардин башқа кишиләрниң инсаний һәқ-һоқуқлири мәсилисигә пәрва қилмайватқанлиқини тәнқидлигән. Баш мақалиниң ахирида әгәр америка һөкүмити дәрһал һәрикәткә өтмисә, америка дөләт мәҗлисиниң бу мәсилини көтүрүп чиқиши керәклики оттуриға қоюлған.

Адәттә ғәрб ахбаратлирида тәһрират намидин берилидиған баш мақалә бәзидә муһим вәқәләргә қарита диққәт тартиш үчүн, бәзидә болса муһим вәқәләргә қарита мәзкур ахбарат орниниң мәйданини ипадиләш үчүн берилиду.

Бүгүн йәнә канаданиң мәшһур ахбарат васитилиридин «йәр шари вә почта» гезитиму баш мақалә елан қилип, әгәрдә хитайниң б д т да қилған сөзлири вә соралған соалларға бәргән җаваблири раст болса, хәлқара таратқулар билән мустәқил тәкшүрүш гуруппилириниң уйғур аптоном райониға беришиға йол қоюши лазимлиқи оттуриға қойған.

Мәзкур баш мақалидә йәнә канада һөкүмитини вә униң иттипақдашлирини уйғур мәсилисидә хитайға қарита давамлиқ бесим ишлитишкә дәвәт қилинған.

Пикирләр (0)
Share
Толуқ бәт