"Washin'gton pochtisi" gézitining bash maqalisi: "Biz bu rehimsizlerche étnik tazilashqa qarap turalmaymiz"

Muxbirimiz shöhret hoshur
2018-08-15
Élxet
Pikir
Share
Print

Bügün, yeni 15-awghust küni "Washin'gton pochtisi" gézitining tehrirati bash maqale élan qilip, nöwette Uyghur diyarida dawam qiliwatqan éghir weziyet heqqide pozitsiye ipadiligen.

"Biz bu rehimsizlerche étnik tazilashqa qarap turalmaymiz" dep mawzu qoyulghan bu bash maqalida Uyghur aptonom rayonida 18 aydin buyan bir milyondin artuq kishining lagérlargha solan'ghanliqi, xitay hökümitining buni intayin mexpiy yosunda élip barghanliqi, epsuslinarliqi dunyaning bu mesilige nisbeten anche diqqet qilmighanliqi we sus inkas qayturghanliqi tilgha élin'ghan.

Mezkur bash maqalide tégishlik jazagha tartilmighan xitayning bu qilmishlirining axiri b d t da so'algha duch kelgenliki we xitay hökümitining tunji qétim bu heqte jawab bérishke mejbur bolghanliqi eskertilgen. Bashqa maqalida yene xitay wekiller ömikining xuddi texmin qilin'ghandek Uyghur diyarida bu xil lagérlarning mewjutluqini inkar qilghanliqi ilgiri sürülgen.

Maqalide xitayning Uyghurlargha qarita élip bériliwatqan étnik tazilash we basturush qilmishlirining emeliyette bérmadiki rohin'ga musulmanlirigha qarita élip bérilghan basturushlardin qélishmaydighanliqi alahide eskertilgen.

"Washin'gton pochtisi" gézitide élan qilin'ghan bu bash maqalide yene prézidént trampning amérikiliqlardin bashqa kishilerning insaniy heq-hoquqliri mesilisige perwa qilmaywatqanliqini tenqidligen. Bash maqalining axirida eger amérika hökümiti derhal heriketke ötmise, amérika dölet mejlisining bu mesilini kötürüp chiqishi kérekliki otturigha qoyulghan.

Adette gherb axbaratlirida tehrirat namidin bérilidighan bash maqale bezide muhim weqelerge qarita diqqet tartish üchün, bezide bolsa muhim weqelerge qarita mezkur axbarat ornining meydanini ipadilesh üchün bérilidu.

Bügün yene kanadaning meshhur axbarat wasitiliridin "Yer shari we pochta" gézitimu bash maqale élan qilip, egerde xitayning b d t da qilghan sözliri we soralghan so'allargha bergen jawabliri rast bolsa, xelq'ara taratqular bilen musteqil tekshürüsh guruppilirining Uyghur aptonom rayonigha bérishigha yol qoyushi lazimliqi otturigha qoyghan.

Mezkur bash maqalide yene kanada hökümitini we uning ittipaqdashlirini Uyghur mesiliside xitaygha qarita dawamliq bésim ishlitishke dewet qilin'ghan.

Toluq bet