Putbol cholpini démba ba xelq'ara jem'iyetni Uyghurlarni qollashqa chaqirdi

Türkiyening “Istanbul bashaq shehiri” kulubida top tépiwatqan sénégal döletlik putbol komandisining ezasi démba ba keng putbol heweskarlirini Uyghurlarni qollash hemde xitay hökümitining wehshiyane siyasetlirini eyibleshke dewet qildi.

BBC Agéntliqining 19-awghusttiki xewiride éytilishiche, démba ba bu sözni Uyghurlar uchrawatqan paji'elerdin xewerdar bolghandin kéyin, axbarat sahesige éytqan. U sözide “Hazir kishilerge melum boluwatqan ‛qarilarning jénimu jan‚ herikiti bashqa irqtiki kishilerning qoshulushi bilen téximu kücheydi. Uyghurlar mesilisidimu biz shundaq qilishimiz lazim,” dégen.

U BBC agéntliqining bu heqtiki ziyaritini qobul qilghanda, özining putbol sahesidikilerni heriketke keltürüp, bu mesilige téximu köp kishilerning diqqitini tartish xiyalida boluwatqanliqini bildürgen. Shundaqla türk neslidin bolghan putbol cholpini mes'ud özilning 2019-yili xitay hökümitining Uyghurlarni basturushini eyiblishi hemde buninggha ulishipla otturigha chiqqan mes'udqa qarshi chuqanlarnimu eslitip ötken. Shuning bilen birge mes'ud top oynawatqan arsénal kulubining “Qarilarning jénimu jan” herikitini ashkara qollighanliqini, emma buningdinmu éghir bolghan Uyghurlar mesiliside arsénal kulubining ta hazirghiche zuwan sürmey kéliwatqanliqini eyibligen.

U bu heqte söz qilip: “Beziler paydini körüpla adaletni ‛körmes‚ bolup qalidu. Biz putbolda adalet üchün kürishimiz, shunga Uyghurlar mesilisidimu mushu prinsip boyiche ish körüshimiz lazim,” dégen.

Melum bolushiche, démba ba 2015-yilidin 2018-yilighiche bolghan ariliqta xitaydiki “Shangxey shinxu'a” kulubi bilen toxtamliship top tepken bolup, xitayda milyonlighan mestaniliri bar iken.