Amérika qelemkeshler jem'iyiti dunyani Uyghur rayonidiki kishilik hoquq depsendichilikige qarshi turushqa chaqirdi

Muxbirimiz erkin
2018-08-20
Élxet
Pikir
Share
Print

Amérika qelemkeshler jem'iyiti, dunyani xitayning Uyghur rayonidiki kishilik hoquq depsendichilikige xatime bérishke yuqiri awazda qayta -qayta chaqirishi kéreklikini bildürdi.

Uning torida élan qilin'ghan "Shinjang: siz anglap baqmighan ipade erkinliki apiti" serlewhilik maqalida mundaq déyilgen: "Xitay hökümitining shinjangdiki ashqunluqqa qarshi turush siyasiti pikir erkinliki we kishilik hoquqqa qilin'ghan zor kölemlik hujum. Rayondiki xeqler özining medeniyiti we diniy étiqadini erkin ipadiliyelmeydu. Buninggha qarshi söz qilish xelq'ara jem'iyet we özini pikir erkinlikining himayichisi, dep qaraydighan barliq tereplerning exlaqiy mejburiyiti."

Maqalida, ilham toxti we tonulghan tetqiqatchi rahile dawuttek Uyghur medeniyet erbablirining ömürlük qamaq jazasi yaki iz déreksiz yoqap kétishtek xewplerge kéliwatqanliqi eskertilip, b d t irqiy ayrimichiliqqa qarshi turush komitéti xitay hökümitining "Zor kölemlik yighiwélish lagérlirini eyibligen" bolsimu, lékin "Xitay diplomatlirining taghdek pakitlargha qarimay buni ret qilghanliqi" tenqid qilin'ghan.

Maqalida, "Dunya uning inkar qilishigha aldanmasliqi kérek. Biz xitayni yuqiri awazda qayta-qayta bu kishilik hoquq rezillikige xatime bergüzüshimiz kérek. Biz buni hazir iztirap chékiwatqan shu kishiler üchünla emes, biz bu siyaset wekillik qilidighan istibdatliqni ret qilish üchünmu qilishimiz kérek" déyilgen.

Maqalida yene, kishilerni perzentlirining ismini özgertishke mejburlinishi, ashkara ibadet qilalmasliqi, téléfonigha "Xeterlik mezmunlar" ni bayqaydighan yumtal qachilinishi, yuqiriqi amillar "Da'imliq xewp" dep qarilip, ularning "Siyasiy qayta -terbiyelesh lagérliri" gha yollinishini tesewwur qilip béqishqa chaqirip, "Belki bu sözler orwélche qabahettek tuyulsimu, lékin bu xitayning shinjang aptonom rayonidiki xelqlerning kündilik hayati. Téksas, kaliforniye, néwada, minisota shtatlirining jem'iy yer kölimige teng kélidighan bu bipayan rayon bügünki künde pikir erkinliki keng kölemlik cheklinip, eng zor kishilik hoquq apiti yüz bériwatqan jaydur" dep körsitilgen.

Toluq bet