Xelq'araning Uyghurlargha köngül bölüshige xitay hökümiti chidimidi

Muxbirimiz eziz
2018-09-04
Élxet
Pikir
Share
Print

Birleshken döletler teshkilati (b d t) we bashqa xelq'araliq teshkilatlar xitay hökümitining ghayet zor sandiki Uyghurlarni lagérlargha qamaqqa élishi heqqide xitay hökümitige oxshimighan chaqiriqlarni élan qilghandin kéyin xitay hökümiti buningdin bekmu narazi boldi.

Xitay hökümitining neshr epkari bolghan "Yer shari waqti géziti" ning 31-awghust sanidiki bash maqalisi hemde "Asiya waqti" gézitining 4-séntebirdiki maqaliliride bu ehwal oxshimighan nuqtilardin bayan qilinidu.

Xitay hökümiti xelq'araning Uyghurlar mesilisi boyiche xitayni eyiblishini "Töhmet" dep atighan, shuningdek jenwediki b d t yighinida "Irqiy ayrimichiliqni tügitish komitéti" ezalirining qilghan sözini "Gherb jama'itining we yalghan melumatlarning qaymuqturushigha uchrighanliq" dep xulase chiqarghan.

Xitay hökümitining bayanatida ikki xil qimmet qarishining Uyghurlar mesilisini merkez qilghan halda bir qétim toqunushup qalghanliqi, gherb merkezchilikini asas qilghan pikir éqimida "Insan heqliri mesilisini chöridigen quruq nezeriyelerning bazargha séliniwatqanliqi, bundaq quruq geplerning emeliyette esebiylikke we malimanchiliqqa qutratquluq qiliwatqanliqi" alahide gewdilendürülgen. Shuning bilen birge xitay hökümitining "Shinjangni bay we qudretlik rayon qilip qurup chiqish üchün qandaq tirishiwatqanliqi, zor malimanchiliq qash bilen kirpik ariliqida qéliwatqanda hökümetning buning aldini alghanliqi, buning bilen muqimliq we parawanliqning ornitilghanliqi" heqqide uzundin uzun wez éytilghan.

"Asiya waqti" gézitining maqaliside körsitilishiche, xitay hökümitining bu xildiki özini aqlash urunushliri xitaydin halqip chet'ellergiche kéngeymekte iken. Aptor misal teriqiside xitayning en'gliyediki bash elchisi lyu shyawmingning "Maliye waqti" gézitige xet yézip, mezkur gézitte élan qilin'ghan Uyghurlar diyarigha munasiwetlik maqalilerdiki "Xata uchurlar we saxta melumatlarni tüzetmekchi" bolghanliqini bayan qilidu. Shuningdek uning "Yer shari waqti géziti" dikige oxshap kétidighan "Uyghurlarning toluq diniy étiqad erkinlikidin behrimen boluwatqanliqi" heqqidiki qarashlarni bazargha salmaqchi bolghanliqi, emma guwahchilar we birinchi qol uchurlarning buninggha zit kélidighan ramizan cheklimisi, diniy isimlarning men'i qilinishi dégendek köpligen ré'al mesililerni delillewatqanliqi kinayilik halda tilgha élinidu.

Toluq bet