MSN Tori Uyghurlarning karantin qiliniwatqanliqini ilgiri sürdi

Muxbirimiz shöhret hoshur
2018-09-05
Élxet
Pikir
Share
Print

Dunyadiki nopuzluq uchur-axbarat wasitiliridin MSN tori bügün, yeni 5-séntebir küni Uyghur weziyiti heqqide bir maqale élan qildi.

Weziyetning yéqinqi birqanche yilliq basquchi pakitlar bilen tepsiliy bayan qilin'ghan bu maqalida Uyghurlarning tashqi dunya bilen bolghan munasiwitining üzüwétilishi alahide diqqetke sunuldi.

"Uyghurlar néme üchün karantin obyékti bolup qaldi" dégen témida yézilghan bu maqalida Uyghurlarning pasportlirining yighiwélinishi, yéngidin pasport bérilmesliki, chet'eldiki Uyghurlarning qayturup ekilinishi we hetta chet'eldin kelgen téléfonlarni qobul qilghanlarningmu "Terbiyelesh" ke élip kétiliwatqanliqi qatarliq ijra'atlar tilgha élindi. Bu ijra'atlar xuddi késili yuqush éhtimali bolghan zira'et, haywanat we ademlerni heriket we yötkilishtin chekleshke, yeni karantin qilishqa oxshitildi.

Maqalida xitay da'irilirining yawa ot-chöpni yoqitish üchün zira'etke dora chéchish usuli neqil keltürülüp, Uyghurlarning pütün bir millet süpitide jaza obyéktigha aylinip qalghanliqi, xitayning bu jaza tedbirini atalmish "Térrorluq" we "Esebiylik" ke qarshi nam astida élip bériwatqanliqi otturigha qoyuldi.

Maqalining axirida bu xil karantin qilinishning netijiside din we siyaset bilen alaqisi bolmighan sahelerdinmu meshhur kishilerning tutqun qilin'ghanliqi toghrisidiki tizimlik bilen körsitildi. Bu tizimlikte putbol cholpini ekrem hézim, alim memet salih hajim, uniwérsitét mudiri tashpolat téyip, proféssor rahile dawut, sha'ir abduqadir jalalidin, naxshichi ablajan ayup, doktor xalmurat ghopurlarning isimlirige orun bérildi.

Toluq bet