Америка авам палатасиниң йәнә бир түркүм әзалири америка һөкүмитини хитайниң уйғурларни бастурушини тохтитишқа чақирди

Мухбиримиз әркин
2018-09-07
Share

Америка авам палатасиниң йәнә бир бир түркүм әзаси җүмә күни трамп һөкүмитини хитайниң уйғурларға қарита елип бериватқан бастуруш сиясити вә кишилик һоқуқ дәпсәндичиликини тохтитишқа, әркин асия радийоси мухбирлириниң аилә әзалирини қоғдаш үчүн тәдбир қоллинишқа чақирди.

Бу америка дөләт мәҗлиси әзалириниң йеқинқи 10 күн ичидә трамп һөкүмитини 2‏-қетим уйғур районидики кишилик һоқуқ дәпсәндичиликигә қарши тәдбир қоллинишқа чақиришидур.

Буниң сәл алдида америка кеңәш вә авам палаталириниң 17 нәпәр әзаси америка ташқи ишлар министири майк понпео билән малийә министири стевен мюнчинға мәктуп йезип, чен чүәнго башчилиқидики хитай әмәлдарлирини җазалашни тәләп қилған иди.

Бу қетим авам палатасиниң стевен чабот, гәрий коноллий, дон бәйер, дәйвид сиссилин, елинор нортон, җәмий раскин, адам шиф, тоний кардинас қатарлиқ демократик вә җумһурийәтчи әзалири майк помпеоға мәктуп язған.

Мәктупта «биз бу хәт арқилиқ хитай һөкүмитиниң шинҗаң уйғур аптоном районидики уйғур вә башқа аз санлиқ милләтләрни бастуруватқанлиқидин қаттиқ әндишә қиливатқанлиқимизни билдүримиз.

Ялғуз милйонлиған кишиниң кишилик һоқуқ хорлашқа учрапла қалмай, америкилиқ журналистлар вә уларниң аилә әзалириму хәтәргә учримақта. Биз сизниң хитай һөкүмитини бу хил бастуруш сияситини тохтитишқа вә халиғанчә тутқун қилинған кишиләрни дәрһал қоюп беришкә чақиришқа үндәймиз» дейилгән.

Мәктупта йәнә, хитай һөкүмитиниң бир милйондин артуқ уйғур вә башқа аз санлиқ милләтләрни тутқун қилип, «сиясий тәрбийәләш лагерлири» ға қамиғанлиқи яки йезиларда омумий йүзлүк тәрбийәләш курслириға қатнишишқа мәҗбурлаватқанлиқи әскәртилип, америка ташқи ишла министирлиқиниң 2017‏-йиллиқ адәм әткәсчилик доклатида, хитай даирилириниң әркәкләр, аяллар вә балиларни әмгәк лагерлириға әвәтип уларни аилилиридин айривәткәнлики тәкитләнгән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт