Amérika awam palatasining yene bir türküm ezaliri amérika hökümitini xitayning Uyghurlarni basturushini toxtitishqa chaqirdi

Muxbirimiz erkin
2018-09-07
Élxet
Pikir
Share
Print

Amérika awam palatasining yene bir bir türküm ezasi jüme küni tramp hökümitini xitayning Uyghurlargha qarita élip bériwatqan basturush siyasiti we kishilik hoquq depsendichilikini toxtitishqa, erkin asiya radiyosi muxbirlirining a'ile ezalirini qoghdash üchün tedbir qollinishqa chaqirdi.

Bu amérika dölet mejlisi ezalirining yéqinqi 10 kün ichide tramp hökümitini 2‏-qétim Uyghur rayonidiki kishilik hoquq depsendichilikige qarshi tedbir qollinishqa chaqirishidur.

Buning sel aldida amérika kéngesh we awam palatalirining 17 neper ezasi amérika tashqi ishlar ministiri mayk ponpé'o bilen maliye ministiri stéwén myunchin'gha mektup yézip, chén chüen'go bashchiliqidiki xitay emeldarlirini jazalashni telep qilghan idi.

Bu qétim awam palatasining stéwén chabot, geriy konolliy, don beyér, deywid sissilin, élinor norton, jem'iy raskin, adam shif, toniy kardinas qatarliq démokratik we jumhuriyetchi ezaliri mayk pompé'ogha mektup yazghan.

Mektupta "Biz bu xet arqiliq xitay hökümitining shinjang Uyghur aptonom rayonidiki Uyghur we bashqa az sanliq milletlerni basturuwatqanliqidin qattiq endishe qiliwatqanliqimizni bildürimiz.

Yalghuz milyonlighan kishining kishilik hoquq xorlashqa uchrapla qalmay, amérikiliq zhurnalistlar we ularning a'ile ezalirimu xeterge uchrimaqta. Biz sizning xitay hökümitini bu xil basturush siyasitini toxtitishqa we xalighanche tutqun qilin'ghan kishilerni derhal qoyup bérishke chaqirishqa ündeymiz" déyilgen.

Mektupta yene, xitay hökümitining bir milyondin artuq Uyghur we bashqa az sanliq milletlerni tutqun qilip, "Siyasiy terbiyelesh lagérliri" gha qamighanliqi yaki yézilarda omumiy yüzlük terbiyelesh kurslirigha qatnishishqa mejburlawatqanliqi eskertilip, amérika tashqi ishla ministirliqining 2017‏-yilliq adem etkeschilik doklatida, xitay da'irilirining erkekler, ayallar we balilarni emgek lagérlirigha ewetip ularni a'ililiridin ayriwetkenliki tekitlen'gen.

Toluq bet