Кишилик һоқуқни көзитиш тәшкилати дуняни уйғур дияридики лагерларға қарита тәдбир қоллинишқа чақирди

Мухбиримиз сада
2018.09.18

Бирләшкән дөләтләр тәшкилати омумий кеңиши башлиниш алдида кишилик һоқуқни көзитиш тәшкилати мәзкур кеңәшкә мунасивәтлик муназириләрдә оттуриға қоюлидиған баянатини елан қилип, һәрқайси әлләрни хитайниң уйғур дияридики лагерларни, бастуруш һәрикитини әйибләштә бирликтә тәдбир қоллинишқа чақирди.

Баянатта, бир уйғурниң хитайниң бастуруш сияситигә қарита ейтқан сөзлири нәқил елинған болуп, у һөкүмәтниң бу хил һәрикити уйғурларниң кимлики, диний етиқади вә мәдәнийитини ассимилятсийә қилиштин башқа иш әмәслики, шу арқилиқ кәлгүсидә уйғурларни пәқәт намидин башқа һечнемисини қалдурмаслиқни мәқсәт қиливатқанлиқини чүшәндүргән. Униңдин башқа йәнә лагерларниң нөвәттики интайин начар шараити һәққидә чүшәнчә берилгән.

Баянатта йәнә бирләшкән дөләтләр тәшкилати кишилик һоқуқ кеңишиниң алий комиссари мишел бәшлет ханимниң сөзи нәқил елинип, өзиниң хитайниң аталмиш “қайта тәрбийәләш мәктипи” гә соланған милйонлиған уйғур мусулманлирини қийнаш вә хорлаш һәрикәтлиридин қаттиқ паракәндә болидиғанлиқини ипадилигән.

Баянатта мундақ дейилгән: “хитай бирләшкән дөләтләр тәшкилатиниң әзаси болуши сүпити билән, уйғур диярида йүргүзүватқан зор көләмлик вә системилиқ бастуруш һәрикәтлиригә қарита җавабкарлиққа тартилиши керәк. Гәрчә бәзи дөләтләр бу хил сиясий бастурушларни сөзләшкә башлиған болсиму, техиму күчлүк бирлик һәрикити хитайниң уйғурларни бастурушида көрүнәрлик сиясий бәдәл төләйдиғанлиқини көрситип берәләйду.”

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.