“ню-йорк почтиси” ниң мухбири: “америка хитайниң алдини тосуш үчүн уйғур мәсилисини көтүрүп чиқиши керәк”

Бүгүн, йәни 19-сентәбир күни “ню-йорк почтиси” гезитидә бәний авни исимлик мухбир тәрипидин йезилған “хитай бир хәлқни бастурушниң йеңи йолини иҗат қиливатиду” мавзулуқ мақалә елан қилинди.

Мақалидә хитайниң уйғур районида йолға қоюватқан бастурушлириниң әмәлийәттә дуняға кеңийишни мәқсәт қиливатқанлиқини оттуриға қойған. Мақалида хитай һинди окян вә оттура шәрққә һаким болуш, йәни “бир йол бир бәлвағ” пиланини иҗра қилишта уйғурларни бир тосалғу дәп қараватқанлиқи, хитайниң уйғур районидики бастуруш һәрикәтлириниң униң империялистик кеңийиш пиланиниң муһим бир парчиси икәнлики илгири сүрүлгән.

Аптор бәни авни бу мақалисидә хитайниң қошна дөләтләргә өзиниң диктатор һакимийәт системисини сиңдүрүшкә урунуватқанлиқи, бу дөләтләрниң нөвәттә яки америкиниң әркин демократийәсидин яки хитайниң һакиммутләқ реҗимидин үлгә елиштәк икки хил таллаштин биригә дуч келиватқанлиқини оттуриға қойған.

Әгәр бу таллашта хитай ғәлибә қилип қалса, қошна дөләтләрдики барлиқ қиммәтлик тәбиий байлиқларниң хитайниң контроллуқиға өтүп кетидиғанлиқи әскәртилгән бу мақалида “америка хитайниң оттура асияға кеңийиш қәдимини тизгинлимәкчи болса уйғур мәсилисини көтүрүп чиқиш - тоғра бир башлиништур” дейилгән.

Мәзкур мақалида йәнә хитайниң америкиға нисбәтән чөчүгүдәк бир риқабәтчи икәнлики, уйғурларниң болса мөтидил йолдики америкиға һәр вақит тәрәпдар болидиған бир мусулман хәлқ икәнлики әскәртилгән. Шуниң билән бир вақитта йәнә америкиниң кишилик һоқуқ нуқтисидинму уйғур мәсилисини көтүрүп чиқиш мәҗбурийити барлиқи тәкитләнгән.