Америка хәлқ райи трамп һөкүмитиниң уйғур мәсилисидә хитайға ембарго қоюшини қоллиған

Мухбиримиз әркин
2020-09-21
Елхәт
Пикир
Share
Принт

Йеқинда елип берилған бир қетимлиқ америка хәлқ райини синаш нәтиҗисидин мәлум болушичә, америка хәлқиниң көп қисми трамп һөкүмитиниң уйғур диярида йүз бериватқан кишилик һоқуқ дәпсәндичилики сәвәблик хитайға ембарго йүргүзүшини қоллайдикән. Лекин американиң хитайда турушлуқ әлчисини қайтуруп келиши вә хитай билән уруш қилишиға қарши икән. Мәзкур рай синаш паалийити бу йил 17-авғусттин 19-авғустқичә «лусид» намлиқ рай синаш орни тәрипидин тор арқилиқ елип берилған.

Рай синашқа американиң мәмликәт миқясидин 1886 адәм қатнашқан болуп, рай синаш кишиләрниң җинси, маарип вә ирқий тәрәплиригә қарап елип берилған. «Вашингтон почтиси» гезитидә 21-сентәбир елан қилинған бу һәқтики хәвәрдә тәкитлинишичә, рай синашқа қатнашқанларниң 54% уйғур йиғивелиш лагерлиридин хәвәрдар икәнликини билдүргән. 55.9% Адәм ембарго йүргүзүшни қоллайдиғанлиқини, 40.8% Адәм бейҗиң қишлиқ олимпик мусабиқисини байқут қилишни, 35.9% Адәм американиң әлчисини қайтуруп келишини қоллайдиғанлиқини қәйт қилған.

Пәқәт 19.6% Киши хитай билән уруш қилишни қоллайдиғанлиқини ипадилигән. «Вашингтон почтиси» ниң хәвиридә тәкитлинишкә, хитай билән уруш қилишни, америка әлчисини қайтуруп келишни, бейҗиң қишлиқ олимпик мусабиқисини байқут қилишни, ембарго йүргүзүшни қоллайдиғанларниң ичидә җумһурийәтчиләр көп санлиқ игиллисиму, әмма буни қоллайдиған демократлар вә мустәқил пикирдикиләрниң нисбити бәк чоң пәрқләнмәйдикән. Хәвәрдә, рай синашқа қатнашқан демократларниң 52.6%, Мустәқил пикирдикиләрниң 49.1% Ембаргони қоллайдиғанлиқи тәкитләнгән.

Пикирләр (0)
Share
Толуқ бәт