Amérika xelq rayi tramp hökümitining Uyghur mesiliside xitaygha émbargo qoyushini qollighan

Muxbirimiz erkin
2020-09-21
Élxet
Pikir
Share
Print

Yéqinda élip bérilghan bir qétimliq amérika xelq rayini sinash netijisidin melum bolushiche, amérika xelqining köp qismi tramp hökümitining Uyghur diyarida yüz bériwatqan kishilik hoquq depsendichiliki seweblik xitaygha émbargo yürgüzüshini qollaydiken. Lékin amérikaning xitayda turushluq elchisini qayturup kélishi we xitay bilen urush qilishigha qarshi iken. Mezkur ray sinash pa'aliyiti bu yil 17-awghusttin 19-awghustqiche "Lusid" namliq ray sinash orni teripidin tor arqiliq élip bérilghan.

Ray sinashqa amérikaning memliket miqyasidin 1886 adem qatnashqan bolup, ray sinash kishilerning jinsi, ma'arip we irqiy tereplirige qarap élip bérilghan. "Washin'gton pochtisi" gézitide 21-séntebir élan qilin'ghan bu heqtiki xewerde tekitlinishiche, ray sinashqa qatnashqanlarning 54% Uyghur yighiwélish lagérliridin xewerdar ikenlikini bildürgen. 55.9% Adem émbargo yürgüzüshni qollaydighanliqini, 40.8% Adem béyjing qishliq olimpik musabiqisini bayqut qilishni, 35.9% Adem amérikaning elchisini qayturup kélishini qollaydighanliqini qeyt qilghan.

Peqet 19.6% Kishi xitay bilen urush qilishni qollaydighanliqini ipadiligen. "Washin'gton pochtisi" ning xewiride tekitlinishke, xitay bilen urush qilishni, amérika elchisini qayturup kélishni, béyjing qishliq olimpik musabiqisini bayqut qilishni, émbargo yürgüzüshni qollaydighanlarning ichide jumhuriyetchiler köp sanliq igillisimu, emma buni qollaydighan démokratlar we musteqil pikirdikilerning nisbiti bek chong perqlenmeydiken. Xewerde, ray sinashqa qatnashqan démokratlarning 52.6%, Musteqil pikirdikilerning 49.1% Émbargoni qollaydighanliqi tekitlen'gen.

Toluq bet