“вашингтон көзәткүчиси” дә президент трампниң уйғур мәсилисини б д т ға елип чиқиши керәклики тоғрилиқ мақалә елан қилинди

Мухбиримиз әркин
2018.10.26

Америкидики “вашингтон көзәткүчиси” намлиқ тор журнилиниң обзорчиси том роган 25‏-өктәбир мақалә елан қилип, президент трампниң хитайниң уйғурларни бастурушини б д т ға елип чиқиши керәкликини билдүргән.

Том роганниң илгири сүрүшичә, президент трамп америкиниң б д т д турушлуқ баш әлчисигә буйруқ берип хәвпсизлик кеңишини йиғинға чақириши, явропани бипәрвалиқтин вә хитайниң мәблиғигә баш егиштин қутқузуши, хитайни уйғур дияридики җаза лагерлириға даир учурларни ашкарилашқа қистиши лазим икән.

Том роган мәзкур журналда елан қилған “трамп арини ечип, хитайниң уйғурларға қаратқан бастурушлирини б д т ға елип чиқиши керәк” намлиқ мақалисидә йәнә мундақ дегән: “биз андин кейин уйғур кризисини пәйда қилған хитай әмәлдарлириға қарита дәрһал ембарго қоюшни башлишимиз керәк. Бәлки, хитай (хәвпсизлик кеңишиниң) қарар лайиһисини рәт қилиду. Әмма йәнила кечиксиму икки ғәлибини ишқа ашуриду.”

Том роганниң қәйт қилишичә, биринчидин бу ши җинпиңниң қилмишиға қарита дуняниң диққитини қозғайдикән. Бу уни қаттиқ алақзадә қилип, униң пәқәт иқтисади мәнпәәтинила чиқиш қилған һаянкәшлик асасидики ташқи сияситини палтилайдикән. Иккинчидин бу америкиниң әхлақий җәһәттики рәһбәрликини намаян қилидикән.

Там роган мақалисидә америкидики уйғур паалийәтчи рошән аббасниң һәдиси вә һаммисиниң йеқинда ғайиб болғанлиқ вәқәсини тилға алған. У мақалисидә рошән аббас өз аилә әзалириниң ғайиб болушини бейҗиңниң өзидин өч елиш һәрикити болуши мумкин, дәп қарайдиғанлиқини тәкитлигән.

Том роган ахирида йәнә мундақ дегән: “рошән аббасниңкидәк вәқәләр ноқул кишилик һоқуқ мәсилиси дәп қаралмаслиқи керәк. Бу вәқәләр 2‏-қетимлиқ соғуқ урушиниң бәдилиниң қандақ болидиғанлиқиға вәкиллик қилиду шуниңдәк немә үчүн дуняни биз тәрәпкә тартишимиз керәкликини көрситип бериду.”

Том роганниң мақалиси америка дөләт мәҗлисиниң бир қисим әзалири “йәр шари магнетиский қануни” ни ишқа селип, уйғурларни хорлашқа иштирак қилған хитай әмәлдарлирини җазалашни тәләп қиливатқан бир мәзгилдә елан қилинди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.