"Washin'gton közetküchisi" de prézidént trampning Uyghur mesilisini b d t gha élip chiqishi kérekliki toghriliq maqale élan qilindi

Muxbirimiz erkin
2018-10-26
Élxet
Pikir
Share
Print

Amérikidiki "Washin'gton közetküchisi" namliq tor zhurnilining obzorchisi tom rogan 25‏-öktebir maqale élan qilip, prézidént trampning xitayning Uyghurlarni basturushini b d t gha élip chiqishi kéreklikini bildürgen.

Tom roganning ilgiri sürüshiche, prézidént tramp amérikining b d t d turushluq bash elchisige buyruq bérip xewpsizlik kéngishini yighin'gha chaqirishi, yawropani biperwaliqtin we xitayning meblighige bash égishtin qutquzushi, xitayni Uyghur diyaridiki jaza lagérlirigha da'ir uchurlarni ashkarilashqa qistishi lazim iken.

Tom rogan mezkur zhurnalda élan qilghan "Tramp arini échip, xitayning Uyghurlargha qaratqan basturushlirini b d t gha élip chiqishi kérek" namliq maqaliside yene mundaq dégen: "Biz andin kéyin Uyghur krizisini peyda qilghan xitay emeldarlirigha qarita derhal émbargo qoyushni bashlishimiz kérek. Belki, xitay (xewpsizlik kéngishining) qarar layihisini ret qilidu. Emma yenila kéchiksimu ikki ghelibini ishqa ashuridu."

Tom roganning qeyt qilishiche, birinchidin bu shi jinpingning qilmishigha qarita dunyaning diqqitini qozghaydiken. Bu uni qattiq alaqzade qilip, uning peqet iqtisadi menpe'etinila chiqish qilghan hayankeshlik asasidiki tashqi siyasitini paltilaydiken. Ikkinchidin bu amérikining exlaqiy jehettiki rehberlikini namayan qilidiken.

Tam rogan maqaliside amérikidiki Uyghur pa'aliyetchi roshen abbasning hedisi we hammisining yéqinda ghayib bolghanliq weqesini tilgha alghan. U maqaliside roshen abbas öz a'ile ezalirining ghayib bolushini béyjingning özidin öch élish herikiti bolushi mumkin, dep qaraydighanliqini tekitligen.

Tom rogan axirida yene mundaq dégen: "Roshen abbasningkidek weqeler noqul kishilik hoquq mesilisi dep qaralmasliqi kérek. Bu weqeler 2‏-qétimliq soghuq urushining bedilining qandaq bolidighanliqigha wekillik qilidu shuningdek néme üchün dunyani biz terepke tartishimiz kéreklikini körsitip béridu."

Tom roganning maqalisi amérika dölet mejlisining bir qisim ezaliri "Yer shari magnétiskiy qanuni" ni ishqa sélip, Uyghurlarni xorlashqa ishtirak qilghan xitay emeldarlirini jazalashni telep qiliwatqan bir mezgilde élan qilindi.

Toluq bet