Kishilik hoquq teshkilatliri b d t ni xitaydin Uyghur rayonidiki lagérlar heqqide jawab bérishni telep qilishqa chaqirdi

Muxbirimiz erkin
2018-11-02
Share

Xelq'ara kishilik hoquq teshkilatliri arqa-arqidin bayanat élan qilip, xitayning b d t da Uyghur rayonidiki yighiwélish lagérlirining heqiqiy ehwalini ashkarilishini telep qildi.

Xelq'ara kechürüm teshkilati 2‏-noyabir küni élan qilghan bayanatida, xitay hökümitining bir milyondek Uyghur musulmanni tutqun qilip, yighiwélish lagérlirigha qamash weqesining heqiqitini ashkarilishi kéreklikini bildürgen.

Bayanatta, "Xitay hökümiti 2017‏-yilning bashliridin bashlan'ghan keng kölemlik yighiwélish, xalighanche jazalash, ten jazasi bérish qilmishlirigha da'ir taghdek pakitlarning aldida axiri bu lagérlarning mewjutluqini étirap qilip, lékin uning 'kespiy terbiyelesh merkezliri' ikenlikini ilgiri sürdi. Biraq, xitay da'irilirining yéqinqi teshwiqati héchkimni aldiyalmaydu.

Halbuki, bu yighiwélish lagérliri ten jazasi we naheq mu'amile yüz bériwatqan orunlardur" déyilgen. Bayanatta xelq'ara kechürüm teshkilatining xitay ishliri tetqiqatchisi patrik punning tekitlishiche, b d t "Kishilik hoquq kéngishi xitay hökümitige uning shinjang Uyghur aptonom rayonidiki bir milyondek kishining xalighanche tutqun qilinishini öz ichige alghan sistémiliq basturush herikitige xatime bérishi kérekliki heqqide keskin signal bérishi kérek" iken.

2‏-Noyabir küni yene amérikidiki "Uyghur kishilik hoquq qurulushi" bayanat élan qilip, b d t gha eza döletlerni kishilik hoquq kéngishining xitay kishilik hoquq xatirisini qerellik körüp chiqish yighinida, xitayning "Sherqiy türkistan" yaki shinjang Uyghur aptonom rayonidiki musulman türkiy xelqlerge élip bériwatqan qebih kishilik hoquq depsendichilikini jawabkarliqqa tartishqa chaqirghan.

Bayanatta yene xitay hökümitining lagérlardiki ölüm-yétim, ten jazasi we shuningdek balilarning a'ililiridin mejburiy ayriwétilishke da'ir ishenchlik xewerlerge jawab bérishi kérekliki bildürülgen.
B d t kishilik hoquq kéngishining xitay kishilik hoquq xatirisini "Qerellik körüp chiqish" yighini 6‏-noyabir bashlinidu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet