Islam ellirining Uyghur musulmanliri heqqide éghiz achmasliqi tenqidke uchridi

Muxbirimiz sada
2018-11-09
Élxet
Pikir
Share
Print

6-Noyabir küni échilghan "Xitayning kishilik hoquq weziyitini qerellik körüp chiqish yighini" axirlishishi bilenla xelq'arada munasiwetlik inkaslar bes-beste otturigha chiqishqa bashlidi.

Shu qatarda kishilik hoquqni közitish teshkilati xitay bölümining diréktori sofiy richardson xanim "Musulman döletliri néme üchün Uyghur musulmanlirini qoghdimaydu?" témisida bir parche maqale élan qildi.

Mezkur maqale bügün, yeni 9-noyabir kishilik hoquqni közitish teshkilatining tor bétige bésilghan. Maqalide xitayning yighin mezgilide Uyghur diyarini "Intayin güzel, tinch hem bixeter jay" dep teswirlishi "Saxtipezlik" dep eyiblen'gen.

Maqalidin melum bolushiche, dunyaning herqaysi jayliridiki tetqiqatchilar, axbarat xadimliri we kishilik hoquq organliri élan qilghan kishilik hoquq depsendichilikige a'it matériyallargha asaslan'ghanda, xitayning nöwettiki omumiy kishilik hoquq weziyiti heqqidiki bayanlirining pütünley saqtiliqini körüwalghili bolidiken.

Maqalide sofiy richardson xanim islam hemkarliq teshkilatigha eza ellerning Uyghur mesilisini tilgha almasliqini béyjing da'irilining gherb suyiqestini janlandurushigha asanliq yaritip berdi, dep körsetken. Uning déyishiche, türkiye gerche "Shexslerning qanuniy asassiz tutqun qilinishi" dep siypap ötüp ketken bolsimu, emma Uyghur mesilisini alahide tilgha almighan.

Sofiy richardsonning bildürüshiche, Uyghur diyaridiki jaza lagérlirining sirtidiki kishilerning hökümetni qarshi élish, xitay xadimlarni özliri bilen bir öyde turushqa teklip qilishtin bashqa tallishi yoq iken.

Buningdin bashqa bügün amérikining "Eksyos" torigha bésilghan munasiwetlik xewerdimu islam ellirining Uyghur mesiliside inkassiz turuwélishi tehlil qilin'ghan. Xewerdin melum bolushiche, xitayning iqtisadiy küchi we shu döletlerge salghan zor sommiliq mebleghliri ularning sükütni tallishining biwasite sewebi iken.

Toluq bet