“Amérika-xitay iqtisad we bixeterlik teptish komitéti” ning yilliq doklatida Uyghur mesilisige orun bérildi

Muxbirimiz irade
2018.11.14

Amérika dölet mejlisi qarmiqidiki “Amérika-xitay iqtisad we bixeterlik teptish komitéti” özining yilliq doklatida Uyghur mesilisi üstide mexsus toxtaldi.

Mezkur komitét 14-noyabir küni élan qilghan yilliq doklatida xitay hökümitining “Bir belwagh bir yol qurulushi” üstide alahide toxtalghan we bu qurulushtiki eng muhim tügünlerning biri dep qariliwatqan Uyghur élidiki weziyetni mexsus tehlil qilghan.

Doklatta, xitay kompartiyesining “Bir belwagh bir yol qurulushi” ni özining mewjutluqini dawam qildurushi üchün hel qilghuch ehmiyetke ige dep qaraydighanliqi, shunga bu qurulushning muhim liniyesi bolghan Uyghur élini tinchlandurushni ghelibige érishishtiki achquch, dep qarap Uyghurlar we bashqa musulman xelqlerni basturuwatqanliqi, rayondiki bir milyondin oshuq kishi, yeni rayondiki az sanliq milletler nopusining 8 pirsentining hazir lagérda ikenliki tilgha élin'ghan.

Mezkur organ yene, xitay hökümitining Uyghurlargha qiliwatqan mu'amilisining hazir “Bir belwagh bir yol qurulushi” üstidiki döletler arisidimu ghulghula peyda qilishqa bashlighanliqi, shunga buning kelgüside mezkur qurulushning ongushluq dawamlishishi üchün bir tosalghu bolushi mumkinlikini bildürgen.

“Amérika-xitay iqtisad we bixeterlik teptish komitéti” doklatida amérika tashqi ishlar ministirliqidin amérika dölet mejlisige “Bir belwagh bir yol qurulushi” istratégiyesige taqabil turush üchün qiliniwatqan xizmetler üstide etrapliq melumat bérishni telep qilghan. Ular amérika tashqi ishlar ministirliqidin yene “Bir belwagh bir yol istratégiyesi” qarmiqidiki qurulushlarning xelq'aradiki qaysi qanunlargha xilapliqini tekshürüshni shundaqla néme üchün xitay hökümitining Uyghurlargha yürgüzülüwatqan bésimgha a'it uchurlarning tarqilishini xalimaydighanliqi, buning “Bir belwagh bir yol qurulushi” bilen néme baghlinishi barliqini tekshürüshke chaqirghan.

Chet'ellerdiki Uyghur közetküchilerning qarishiche, mezkur komitét amérika hökümiti we dölet mejlisining xitaygha qaritidighan siyasetlirige küchlük tesir körsitidighan organlarning biri bolghachqa, uning yilliq doklatida Uyghur mesilisige orun bérilishining ehmiyitini zor iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.