Вашингтон почтиси гезити: «биз хитайниң шинҗаңдики қилмишини җавабкарлиққа тартишимиз керәк»

Мухбиримиз әркин
2018-11-26
Елхәт
Пикир
Share
Принт

Америкиниң «вашингтон почтиси» гезити 24‏-ноябир баш мақалә елан қилип, америка дөләт мәҗлисиниң «уйғур кишилик һоқуқ сиясити қануни» ни тезрәк мақуллишини вә хитайниң уйғур районидики қилмишини җавабкарлиққа тартишини тәләп қилған.

Баш мақалидә қәйт қилинишичә, әгәр «уйғур кишилик һоқуқ сиясити қануни» мақулланса, бу уйғур районидики лагерлар вә омумйүзлүк тәқибләш системисиға иштирак қиливатқан хитай ширкәтлирини дөләт мәҗлисигә доклат қилиш, бу ширкәтләргә ембарго қоюш, америка федератсийә тәкшүрүш идарисиниң америкидики уйғурларға паракәндичилик салған хитай әмәлдарлирини тәқиб қилишиниң йолини ачидикән.

Йеқинда америка дөләт мәҗлисиниң марку рубио, роберт менәндәз, кристофир симит қатарлиқ әзалири кеңәш вә авам палаталирида бирла вақитта «уйғур кишилик һоқуқ сиясити қанун лаһийәси» ни оттуриға қойған иди. Баш мақалидә трамп һөкүмитиниң уйғур районидики бастурушқа қарши йетәрлик тәдбир алмиди, дәп қариливатқанлиқи вә дөләт мәҗлисиниң бу бошлуқни толдуруши керәклики билдүрүлгән. Бу, «вашингтон почтиси» гезитиниң йеқинқи 6 ай ичидә бир қанчә қетим баш мақалә елан қилип, америка дөләт мәҗлиси вә һөкүмитини хитайниң уйғур районидики кишилик һоқуқ дәпсәндичиликлирини җавабкарлиққа тартишқа чақиришидур.

Баш мақалидә йәнә йеқинда бейҗиңдики 15 ғәрб баш әлчисиниң чен чүәнго билән көрүшүшни тәләп қилғанлиқи, лекин америка баш әлчисиниң уларға қетилмиғанлиқи, шуниңдәк дунядики мусулман дөләтләрниң наһәқ сүкүт қиливатқанлиқи, америкиниң башқа демократик әлләр билән бир мәйданда туруши керәклики билдүрүлгән. Баш мақалиниң ахирида: «хитай өзиниң һәрикитини террорлуқ, ашқунлуққа қарши туруш, дәп ақлисиму, бирақ бәзи мутәхәссисләр мөлчәрлигәндәк униң шинҗаңдики 20 яштин 79 яшқичә болған мусулман нопусиниң 11.5 Пирсәнтини қамиши униңға ишинишни мүшкүлләштүрди. Он миңлиған кишини қамаққа елип, андин уларниң миллити, мәдәнийитини йоқитишқа урунуши пүтүн хәлққә қаритилған җинайәт. Буни һәрқандақ урунуш буни йошуралмайду» дейилгән.

Пикирләр (0)
Share
Толуқ бәт