Közetküchiler: "Amérikining Uyghur mesilisige qandaq inkas qayturushi uning dölet obrazigha munasiwetlik bir mesile bolup qaldi"

Muxbirimiz irade
2018-11-29
Élxet
Pikir
Share
Print

Amérika hökümitini Uyghur mesiliside jiddiy tedbir élishqa chaqiridighan awazlar köpeymekte.

28-Noyabir küni "Tashqi siyaset" zhurnilida maykil fush, daniyal bineym qatarliq közge körün'gen tetqiqatchilarning imzasida bir maqale élan qilindi. Maqalide Uyghurlarning xitay hökümiti yürgüzüwatqan bésim siyasiti seweblik erkin sayahet qilish, din'gha étiqad qilish, uruq-tughqanliri bilen sözlishish, balilirigha xalighan isimni qoyush qatarliq eng eqelliy insaniy hoquqliridinmu mehrum qéliwatqanliqi ilgiri sürülgen. Maqalide yene amérikining san-firansisko shehirining nopusigha teng kélidighan milyonlarche ahalining hazir lagérgha qamalghanliqidek pakitlarni sanap ötüp, bu mesilige amérika hökümitining choqum tedbir élishi kéreklikini eskertken.

Ular maqaliside "Amérika hökümiti belkim xitaygha qarshi arzu qilghinidek hemme tedbirni alalmasliqi mumkin, emma shundaqtimu u dunyaning diqqitini bu mesilige tartishi kérek, béyjinggha bésim ishlitishi kérek. Amérika Uyghurlar we rayondiki bashqa musulman xelqlerning azablirini yenggillitishning yollirini izdishi we xitayning bésim siyasetliridin ülge almaqchi boluwatqan bashqa hökümetlerni tosushi kérek," dep eskertken.

Yuqiriqi tetqiqatchilar xitay hökümitining Uyghur élide yuqiri téxnikiliq hakimmutleq dölet sistémisini sinaq qilip, buni dölet ichi we sirtida omumlashturushni közlewatqanliqini, Uyghurlarning esli-weslini, yiltizini we medeniyitini qurutup, "Yéngi bir xitay puqrasi" qilip yasap chiqishqa heriket qiliwatqanliqini otturigha qoyghan shundaqla buning pütün dunya üchün bir zor xewp ikenlikini eskertken.

Ular axirida amérika hökümitige chaqiriq qilip, "Amérika hökümiti belkim dunyadiki pütün mesililerni hel qilishqa yétiship bolalmasliqi mumkin. Emma washin'gtonning bu müshkül ehwalgha qandaq yosunda inkas qayturidighanliqi amérika dölitining obrazi üchün élip éytqanda intayin muhim. Amérika xitay hökümitining shinjangda yürgüzüwatqan zulumlirigha köz yumup turalmaydu," dégen.

Toluq bet