Хитай һөкүмитиниң уйғурларға «алаһидә муамилә» қиливатқанлиқи әндишә қозғимақта

Мухбиримиз әзиз
2019-12-17
Елхәт
Пикир
Share
Принт

Уйғур аптоном районлуқ һөкүмәтниң рәиси шөһрәт закир йеқинда бейҗиңда лагерларни ақлап «кәспий тәрбийәләш мәктәплиридики курсантларниң көп қисми оқуш пүттүрүп, җәмийәт қойниға қайтип кәлди,» дегән иди.

16-Декабир күни «вашингтон почтиси гезити» тәһрират мақалиси елан қилип, «оқуш пүттүрди» дегән аталғуниң буниңдин кейинки лагер тутқунлириниң йеңи тәқдиридин бешарәт бериватқанлиқини алаһидә мулаһизә қилди.

Тәһрират мақалисидә көрситилишичә, лагердики тутқунларниң миллий вә диний кимликидин ваз кечиш, хитайчә тил өгинишкә мәҗбурлиниш арқилиқ уйғурға хас тил, дин вә мәдәнийәт амиллири пүтүнләй йоқитиливатқан әһвалда уларниң немидин оқуш пүттүргәнликигә чоң бир соал қоюлидикән. Шундақла һазирғичә мәлум болған көплигән ишәнчлик учурлардин «оқуш пүттүргән» курсантларниң әмәлийәттә лагерлардин һечқанчә пәрқ қилмайдиған завут-фабрикиларға ишчилиққа әвәтиливатқанлиқи, бу завутларниң лагерларға қошна орунларда яки лагерларниң йәр астиға җайлашқанлиқи баян қилинған. Германийәлик тәтқиқатчи адрян зенз хитай һөкүмити тарқатқан ички һөҗҗәтләр асасидики издинишлири арқилиқ хитай һөкүмитиниң бу қилмишни типик болған «нишанлиқ мәдәнийәт қирғинчилиқи» дәп көрсәтмәктә.

Болупму хитай һөкүмити тарқатқан бәзи уқтурушларда тоқсу вә йәкән наһийәлиридики бир қисим завутларниң «йерим һәрбийчә башқурулидиғанлиқи», буниңға керәклик сақчи вә алаһидә оқутқучиларни һөкүмәт тәрәп тәмин етидиғанлиқи ейтилған. Һалбуки, бу тутқунларниң мутләқ көп қисми лагерларға қамилиштин бурун өзигә тонушлуқ һүнәр-кәсип саһәсидә аллиқачан «пишип болған» кишиләр болуп, «вашингтон почтиси гезити» ниң тәһрират мақалисидә бу хилдики мәҗбурий әмгәк шәклиниң йетәрлик диққәт қозғиши алаһидә әскәртилиду.

Пикирләр (0)
Share
Толуқ бәт