«Ню-йорк вақти» гезити уйғур мусапирлириниң панаһлиқ мәсилисидә қийниливатқанлиқини хәвәр қилди

Мухбиримиз әркин
2018-10-29
Елхәт
Пикир
Share
Принт

«Ню-йорк вақти» гезити йәкшәнбә күни хәвәр елан қилип, хитайниң бастурушидин қечип чиққан, лекин панаһлиқ мәсилисидә қийниливатқан уйғурларниң мәсилисини оттуриға қойди.

Хәвәрдә сиясий панаһлиқ илтимаси рәт қилинип, хитайға қайтип кетиши тәләп қилинған бир уйғур аилисиниң әһвали тонуштурулған.

Хәвәрдә баян қилинишичә, нөвәттә абдуқадир ясин исимлик уйғур мусапири вә униң аилиси хитайға қайтурулуштин қутулған болсиму, әмма униң қанунлуқ бир салаһийәткә еришиши ениқсизкән.

«Улар хитайниң бастурушидин қечип қутулди, әмма ениқсизлиқ ичидә күтмәктә» сәрләвһилик хәвәрдә, абдуқадир вә униң аилиси бу хил ениқсиз қисмәткә дуч келиватқан уйғур мусапир аилилириниң бири икәнлики тәкитләнгән.

Хәвәрдә уйғур мусапирлириниң даим бу хил ениқсизлиқ, хитайға қайтурулуш хәвпи, туруш рухсити мәсилиси, юртидики аилә әзалиридин әнсирәш қатарлиқлар ичидә яшайдиғанлиқи билдүрүлгән.

Абдуқадир ясин 2015‏- йили аяли вә бир балиси билән шиветсийәгә келип сиясий панаһлиқ сориған, бирақ униң панаһлиқ илтимаси рәт қилинған. Шуниң билән у германийәгә берип панаһлиқ тилигән. Леки, германийә униң шиветсийәдә панаһлиқ сориғанлиқини илгири сүрүп, йеқинда уни шиветсийәгә қайтурувәткән. Шиветсийә болса хитайға қайтип кетишини тәләп қилған. Бирақ, шиветсийә көчмәнләр идариси 10‏-айда шиветсийәдики кишилик һоқуқ тәшкилатлириниң тәлипи билән уйғур мусапирлирини хитайға қайтурушни тохтатқан иди.

Хәвәрдә, абдуқадир вә униң аилиси хитайға қайтурулуштин қутулған болсиму, бирақ униң шиветсийәдә қелиши йәнила ениқсиз икәнлики билдүрүлгән. Абдуқадирниң қаришичә, шиветсийә көчмәнләр идарисидики хадимлар уйғурларниң вәзийитини чүшәнмәйдикән.

У «ню-йорктики- йорк вақти» гезитиниң мухбириға: «биз йәнила хатирҗәм әмәс. Лекин мән хәвәрләрдә кишиләрниң юртимизда немә болуватқанлиқини чүшинишкә башлиғанлиқини көрүп хушал болдум» дегән.

Пикирләр (0)
Share
Толуқ бәт