Баңкок почтиси: «уйғур мусапирлар һөрлүккә ериши керәк»

Мухбиримиз сада
2018-11-20
Елхәт
Пикир
Share
Принт

Уйғур кишилик һоқуқ қурулуши «баңкок почтиси» дә бир парчә мақалә елан қилип, тайланд һөкүмитини 2014-йилидин буян қамақта туруватқан уйғурларни қоюветишкә чақирди.

«Уйғур мусапирлар һөрлүккә ериши керәк» сәрләвһилик мақалә «баңкок почтиси» ниң 20-ноябир саниға бесилған. Мақалә уйғур кишилик һоқуқ қурулушиниң директори өмәр қанат әпәнди тәрипидин йезилған. У мақалисидә 2014-йилидин башлап тайланд һөкүмити тутқун қилған, хитайға қайтурувәткән вә шу җәрянда һаятидин айрилған уйғурларниң әһвалини тәпсилий баян қилип чиққан.

У мақалисиниң башланмисида 2014-йилдин бери тайланд көчмәнләрни тутуп туруш орнида тутуп турулған, 2018-йил авғустниң тунҗи күни шу йәрдә җан үзгән 27-яшлиқ билал исимлик уйғур йигитиниң вәқәсини нуқтилиқ чүшәндүргән. Униңдин башқа 2015-йили тайланд һөкүмитиниң бирләшкән дөләтләр тәшкилатиниң «еғир җаза беришни чәкләш әһдинамиси» гә хилап һалда мәҗбурий хитайға қайтурувәткән 109 уйғурниң вәқәсини тилға елиш арқилиқ тайланд һөкүмитини қаттиқ әйиблигән.

Өмәр қанат әпәнди йәнә 2017-йили ноябир ейида малайсия һөкүмитиниң тайланд түрмисидин қечип малайшияға панаһланғили барған 11 уйғурни хитайниң бесимиға қаримай түркийәгә йолға салғанлиқиниму тилға елип өткән. юқириқи 11 уйғур мусапир малайсия баш министири тәрипидин «гунаһсиз» дәп қаралған болуп, аптор бу вәқәни нәқил елиш арқилиқ икки һөкүмәтни өз-ара селиштурған.

Мақалә ахирида аптор өзлириниң изчил тайланд һөкүмити тәрипидин тутуп турулуватқан башқа уйғурларни дәрһал қоюп берип, бихәтәр үчинчи бир дөләткә йолға селиштәк бир тоғра қарарни чиқиришини үмид қилидиғанлиқини билдүргән.

2014-Йили 300 гә йеқин уйғур мусапир тайландта тутулуп «чеградин қанунсиз кериш җинайити» билән түрмигә ташланған. Булардин 175 нәпәр киши түркийә йәрләштүрүлгән болсиму, йәнә 100 дин артуқ уйғур хитайға қайтуруп берилип хәлқаралиқ әйибләшкә учриған иди.

Пикирләр (0)
Share
Толуқ бәт