"Erkin asiya radiyosi" muxbirlirining a'ile tawabi'atlirining tehditke uchrishi küchlük naraziliq peyda qildi

Muxbirimiz irade
2018-04-05
Élxet
Pikir
Share
Print

"Erkin asiya radiyosi" Uyghur bölümi muxbirlirining Uyghur élidiki a'ile-tawabi'atlirining xitay da'irilirining tehditige uchrap, tutqun qilinishi küchlük diqqet qozghimaqta.

"Erkin asiya radiyosi" seyshenbe küni Uyghur bölümining 6 neper muxbirining yurtidiki uruq-tughqanlirining xitay saqchi da'irilirining tehditige uchrighanliqi we bezilirining tutqun qilin'ghanliqi heqqide mexsus bir sin xewiri ishlep tarqatti. Mezkur sin filimi qisqa waqit ichide ijtima'iy taratqularda küchlük inkas peyda qildi.

Bügün "Washin'gton pochtisi" géziti bu sin filimini öz sehipiside élan qildi. Bu heqtiki xewerde "Erkin asiya radi'osi" Uyghur bölümi muxbirlirining Uyghur diyaridiki a'ile-tawabi'atlirining del ularning xizmiti seweblik tutqun qilin'ghanliqi eskertildi.

Amérika kéngesh palatasining ezasi marko rubiyo amérikining xitayda turushluq bash elchisi térriy brandstandgha ewetken mektupidimu bu mesilini alahide tilgha aldi. U mektupida bash elchidin bash shtabi washin'gtondiki "Erkin asiya radiyosi" Uyghur bölümi muxbirlirining uruq-tughqanlirining tutqun qilinish mesilisini alahide muhim orun'gha qoyup, ularning aqiwiti we salametlik ehwalini sürüshte qilishni shundaqla ularning qoyup bérilishi üchün xitay hökümitige bésim ishlitishni telep qildi.

Yéqinda "Xelq'araliq muxbirlarni qoghdash jem'iyiti" mu bayanat élan qilip, "Xitay hökümitining muxbirlarning a'ile-ezalirini jazalishi zorawanliqta heddidin ashqanliqtur," dep körsetti. "Xelq'ara kishilik hoquqni közitish teshkilati" xitay ishliri bölümining diréktori soféy réchardson xanim radiyomizgha qilghan sözide xitay hökümitining chet'ellerdiki Uyghurlarni yurtidiki uruq-tughqanliri arqiliq jazalimaqchi bolushi "Yirginchlik bir istratégiye, buninggha démokratik hökümetler derhal qarshiliq bildürüshi kérek," dédi.

Toluq bet