Д у қ пүтүн дунядики уйғурларни бирюсселға йиғилип, зор көләмлик намайиш өткүзүшкә чақирди

Мухбиримиз әркин
2018-01-22
Елхәт
Пикир
Share
Принт

Дуня уйғур қурултийи пүтүн дунядики уйғурларни бу йил 4-айниң 27-күни белгийә пайтәхти бирюсселға йиғилип, явропа парламенти вә явропа комиссийәсиниң алдида 5 миң кишилик намайиш өткүзүшкә чақирди.

Дуня уйғур қурултийиниң дүшәнбә күни елан қилған баянатида қәйт қилишичә, намайишниң мәқсити уйғур хәлқиниң «йүрәк садасини ғәрб демократик дөләтлиригә тәсирлик аңлитиш, явропа парламенти вә явропа иттипақини шәрқий түркистандики хитай зулумиға қарши җиддий қарарлар қобул қилдуруш һәмдә әмилий бесим қилишқа чақириш» икән.

Д у қ ниң мәзкур пилани хитайниң уйғурларға қаратқан бесими мислисиз күчийип уйғур җәмийити омумйүзлүк тәқиб астиға елинған, онмиңлиған уйғурлар йепиқ тәрбийәләш мәркәзлиригә солинип, уйғурларниң мәдәнийити, тили, маарипи, диний етиқади, тили, иқтисади, өрп-адәт вә күндилик турмуши еғир бузғунчилиққа дуч келиватқан мәзгилдә оттуриға қоюлди.

Уйғурларниң вәзийитидики бу өзгириш аптоном районлуқ партком секретари чен чүәнго 2016‏-йили 8‏-айда уйғур илиға йөткәп келингәндин кейин башланған. Униң сиясити хәлқара ахбарат васитилири, хәлқара кишилик һоқуқ тәшкилатлири, америка дөләт мәҗлиси, явропа парламентиниң бир қисим әзалирини әндишисини қозғиған. Йеқинда америка дөләт мәҗлисиниң икки әзаси чен чүәнгониң сияситини тәнқид қилған иди.

Дуня уйғур қурултийиниң билдүрүшичә, намайишта явропа кеңиши, явропа парламенти вә явропа комиссийәсиниң рәһбәрлиридин уйғур намайишчилар вәкиллирини қобул қилиши тәләп қилинип, «шәрқий түркистан хәлқиниң йүрәк садаси, муһаҗирәттики уйғурларниң тәләп-истәклири уларға биваситә йәткүзүлидикән». Баянатта йәнә, бирюсселдики намайишқа қатнишиш имканийити болмиған, шималий америка, японийә, австралийә қатарлиқ қитә вә дөләтләрдики уйғурларниң охшаш бир күндә намайиш елип бериши тәләп қилинған.

Пикирләр (0)
Share
Толуқ бәт