Хитай һөкүмити уйғур диярида 110 миңдин артуқ кишини навайчилиқ карханилириға йиғивалған

Мухбиримиз әзиз
2021-10-14
Share

Хитай һөкүмитиниң уйғур дияридики аталмиш "хәлқ турмушиға бәхт яритиш" қа даир тәшвиқатиниң йәнә бир түрлүк мәзмуни илгирики тарқақ һалда өз алдиға тиҗарәт қилидиған барлиқ навайларни бир йәргә топлап, коллектип шәкилдә нан яқтуруши болмақта.

"хитай хәвәр тори" ниң учуриға қариғанда, хитай һөкүмити уйғур райониниң һәрқайсий җайлирида илгирики навайларни өз ичигә алған 110 миңдин артуқ кишини һөкүмәт қурған навайчилиқ карханилириға йиғивелип, коллектип нан йеқишқа салған. Буниң ичидә пәқәт қәшқәр шәһиридики "навайлар бағчиси" ға йиғивалған уйғур навайларниң сани 37 миңдин ашидикән. Қәшқәр шәһридики "навайлар бағчиси" ға топланған навайлар ток билән қизитилидиған тонурларда коллектип нан яқидикән. Һәр күни бу җайда йеқилған 500 миң нан удуллуқ мәхсус машинида тошуп кетилидикән. Хәвәрдә буни навайлиқ кәспиниң көләмлишиши, кәсплишиши вә базарға йүзлиниши, дәп тәшвиқ қилиш билән биргә, уйғур навайларниң мушу арқилиқ илгирикидинму көп пул тапидиған болуп кәткәнликини алаһидә тәкитлигән.

Шу қатарда навайлардин һәсәнҗан йүсүп мухбирларға сөз қилип: "мән пәқәт иҗарә алған тонурниң ток вә газ пулини төлисәмла болиду. яққан нанларни сатимән дәп һәрәҗ тартидиған иш әмди түгиди" дегән. Хәвәрдә ейтилишичә, қәшқәр тәвәсидә бу хил навайлар коллектип һаләттә топланған "навайлар бағчиси" 14 җайда қурулған болуп, һәркүни алтә йерим милйонға йеқин нан йеқилидикән. Һөкүмәтниң мәхсус гурупписи бу нанларни сетишқа мәсул болидикән.

Һалбуки, радийомизниң йеқинқи мәзгилләрдики әһвал игиләшлири җәрянида хитай һөкүмитиниң нөвәттики хитайлаштуруш һәркити җәрянида уйғур әнәниви турмуш адәтлирини һәмдә турмуш услубини хитайчилаштуруш муһим нишан болуватқанлиқи, бу җәрянда уйғур һүнәрвәнләрниң колликтип һалда әрзан баһалиқ "мәҗбурий әмгәк" кә мәһкум болуватқанлиқи ашкара болған иди. Хитай һөкүмитиниң мәзкур хәвиридики навайларниң пәқәт нанла йеқиши, әмма йеқилған нанни һөкүмәт тармақлириниң елип кетиши һәққидики баянлар бу һәқтики техиму көп билинмигән әһваллардин мәлумат бәрмәктә икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт