Xitay hökümiti Uyghur diyarida 110 mingdin artuq kishini nawaychiliq karxanilirigha yighiwalghan

Muxbirimiz eziz
2021-10-14
Share

Xitay hökümitining Uyghur diyaridiki atalmish "Xelq turmushigha bext yaritish" qa da'ir teshwiqatining yene bir türlük mezmuni ilgiriki tarqaq halda öz aldigha tijaret qilidighan barliq nawaylarni bir yerge toplap, kolléktip shekilde nan yaqturushi bolmaqta.

"Xitay xewer tori" ning uchurigha qarighanda, xitay hökümiti Uyghur rayonining herqaysiy jaylirida ilgiriki nawaylarni öz ichige alghan 110 mingdin artuq kishini hökümet qurghan nawaychiliq karxanilirigha yighiwélip, kolléktip nan yéqishqa salghan. Buning ichide peqet qeshqer shehiridiki "Nawaylar baghchisi" gha yighiwalghan Uyghur nawaylarning sani 37 mingdin ashidiken. Qeshqer shehridiki "Nawaylar baghchisi" gha toplan'ghan nawaylar tok bilen qizitilidighan tonurlarda kolléktip nan yaqidiken. Her küni bu jayda yéqilghan 500 ming nan udulluq mexsus mashinida toshup kétilidiken. Xewerde buni nawayliq kespining kölemlishishi, kesplishishi we bazargha yüzlinishi, dep teshwiq qilish bilen birge, Uyghur nawaylarning mushu arqiliq ilgirikidinmu köp pul tapidighan bolup ketkenlikini alahide tekitligen.

Shu qatarda nawaylardin hesenjan yüsüp muxbirlargha söz qilip: "Men peqet ijare alghan tonurning tok we gaz pulini tölisemla bolidu. Yaqqan nanlarni satimen dep herej tartidighan ish emdi tügidi" dégen. Xewerde éytilishiche, qeshqer teweside bu xil nawaylar kolléktip halette toplan'ghan "Nawaylar baghchisi" 14 jayda qurulghan bolup, herküni alte yérim milyon'gha yéqin nan yéqilidiken. Hökümetning mexsus guruppisi bu nanlarni sétishqa mes'ul bolidiken.

Halbuki, radiyomizning yéqinqi mezgillerdiki ehwal igileshliri jeryanida xitay hökümitining nöwettiki xitaylashturush herkiti jeryanida Uyghur en'eniwi turmush adetlirini hemde turmush uslubini xitaychilashturush muhim nishan boluwatqanliqi, bu jeryanda Uyghur hünerwenlerning kolliktip halda erzan bahaliq "Mejburiy emgek" ke mehkum boluwatqanliqi ashkara bolghan idi. Xitay hökümitining mezkur xewiridiki nawaylarning peqet nanla yéqishi, emma yéqilghan nanni hökümet tarmaqlirining élip kétishi heqqidiki bayanlar bu heqtiki téximu köp bilinmigen ehwallardin melumat bermekte iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet