Хитай даирилири уйғур навайчилиқини монопол қилишқа вә уни завутлаштурушқа башлиған

Мухбиримиз әркин
2020-08-21
Share

Хитай даирилири уйғур диярида чоң көләмлик навайчилиқ завутлирини қуруп, уйғурларниң әнәниви йемәклик кәспий болған навайчилиқни монопол қилишқа башлиған.

Мәлум болушичә, даириләр буниңдин кейин шәхсий навайханиларни чәкләп, пуқраларниң нанға болған еһтияҗини чоң көләмлик навайчилиқ завутлири арқилиқ бир туташ тәминләйдикән. Көзәткүчиләр, бу хитай даирилириниң уйғурларниң мустәқил йәккә игилик кәсиплирини йоқитип, уйғурларниң күндилик турмушидики әң асаслиқ истемал буюмлириниң тәминатиниму монопол қилишқа башлиғанлиқини тәкитлимәктә.

Хитай таратқулириниң билдүрүшичә, нөвәттә бу хил навайчилиқ завутлири уйғур дияриниң җәнубидики қәшқәр, ақсу, хотән, қизилсу қатарлиқ вилайәт, областларда кәң көләмдә қурулмақта икән. Шинхуа агентлиқиниң 20-авғуст бәргән хәвиридә пәйзиват наһийәсидики «нан мәдәнийити ишләпчиқириш бағчиси» да 1000 кишиниң ишләйдиғанлиқи, бирла вақитта 360 тонурда нан йеқилидиғанлиқи илгири сүрүлгән.

Хәвәрдә 2019-йили 11-айда қурулған мәзкур «нан мәдәнийити бағчиси» ниң илгири тарқақ һаләттики уйғур навайчилиқ игиликини бирликкә кәлтүрүп, ишқа орунлишиш пурсити вә нан тәминат һалқисини кеңәйткәнлики, нан билән бир туташ тәминләшни ишқа ашурғанлиқи тәкитләнгән. Лекин уйғур кишилик һоқуқ паалийәтчилириниң тәкитлишичә, хитай һөкүмити уйғур йәккә навайханилирини йоқитип, бурунқи мустәқил уйғур навайлирини «нан мәдәнийити ишләпчириш базилири» намидики карханиларға йиғивелип, уларни әркин касиплиқ пурситидин мәһрум қилмақта икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт