Хитай даирилири йәнә доклат елан қилип, уйғур нопусини контрол қилғанлиқини инкар қилди

Мухбиримиз әркин
2021-01-08
Share

Хитайниң уйғур елидики "шинҗаң тәрәққият тәтқиқат мәркизи" доклат елан қилип, хитай һөкүмитиниң уйғур нопусини контрол қилғанлиқи вә уйғур нопусиниң азийип кәткәнликини инкар қилди. Доклатта тәкитлинишичә, уйғур нопуси 1949-йилдин 2018-йилғичә изчил көпийип кәлгәникән. Доклатта уйғур нопусиниң туғулуш вә тәбиий көпийиши 2017-йилдин башлап тез чүшүшкә башлиғанлиқии етирап қилинған болсиму, бирақ униң сәвәби башқа амилларға бағлап чүшәндүрүлгән.

Доклатта тәкитлинишичә, униңға диний радикаллиқниң яхши контрол қилиниши, пиланлиқ туғут сияситиниң "тоғра иҗра қилиниши, уйғур әр-аяллириниң пәрзәнт көруш, никаһ мәсилилиридики идийәсиниң өзгириши" қатарлиқ амиллар сәвәб болғаникән. Бу доклат хәлқарада хитай уйғур аяллирини туғмас қилип, "ирқий қирғинчилиқ" елип бериш билән әйиблиниватқан мәзгилдә елан қилинди. Йеқинда америка ташқи ишлар министири майк помпейониң буйруқ чүшүрүп, хитайниң "ирқий қирғинчилиқ" садир қилған-қилмиғанлиқини баһалашни тәләп қилғанлиқи илгири сүрүлгән.

Хитайниң доклатида, уйғур нопусиниң 2017-йилдин бурунқи әһвали сөзлинип, униң йеқинқи 3 йиллиқ әһвали, милйонлиған уйғурниң лагер вә түрмиләргә қамилишиниң нопус тәрәққиятиға көрсәткән тәсири, уйғур әр-аяллириниң пәрзәнтлик болуш вә никаһ мәсилилиридики идийәсиниң 2017-2018-йиллири ичидә туюқсиз өзгирип кетишидәк һалқилиқ соалларға җаваб берилмигән. Доклаттики санлиқ мәлуматлар техиму гуман пәйда қилған болуп, униңда уйғур ели нопусиниң 2010-йилдин 2018-йилғичә 25.04% Көпәйгәнлики, бирақ 2018-йили туғулуш нисбитиниң 10.69% Гә, тәбиий көпийишниң 6.13% Кә чүшкәнлики илгири сүрүлгән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт