Xitay emeldari Uyghurlarning nopusini kontrol qilishqa chaqirdi

Uyghur aptonom rayonluq ayallar birleshmisining partkom sékrétari we mu'awin mudiri xu xenméy qattiq tedbir qollinip, “ Jenubiy shinjang” diki yerlik ahalilerning tughut nisbitini kontrol qilishqa chaqirghan. U bu pikirni Uyghur aptonom rayonluq siyasiy kéngeshning 11‏-nöwetlik 3‏-omumiy yighinida otturigha qoyghan.

U, hazirgha qeder Uyghurlarning nopusini kontrol qilishni ashkara otturigha qoyghan yuqiri derijilik 2‏-xitay emeldari.

Ötken yili Uyghur aptonom rayonluq partkom sékrétari jang chünshyen Uyghurlargha bir perzentlik pilanliq tughut tüzümini yolgha qoyup, muqimliqni qoghdaydighanliqini bildürgen.

Xitay axbaratining xewer qilishiche, xu xenméy “Jenubiy shinjang” da yéza-kentlerdiki tughut nisbiti ensirigüdek yuqiri, yerlik er-ayallar diniy nikah qilip, hökümetke tizimgha aldurmaydighanliqini bildürgen.

Uning qarishiche, bu, balilar we ayallarning jismaniy, zéhniy salametlikige selbiy tesir qilipla qalmay, rayonning nopus süpitige tesir qilip, ijtima'iy muqimliqqa tehdit peyda qilghan.

Biraq Uyghur teshkilatlirining qarishiche, xitayning pilani siyasiy gherezlik. U Uyghur nopusini kontrol qilish arqiliq ularning aptonom rayondiki küchini ajizlitishqa urunuwatidu.