Хитай уйғур аптоном райониниң нопуси 23 милйон 600 миңға йәткәнликини елан қилди

Мухбиримиз әркин
2016-02-10
Елхәт
Пикир
Share
Принт

Уйғур аптоном районлуқ һөкүмәт мәзкур районниң омумий нопуси 2015‏-йилниң ахирлирида 23 милйон 600 миңға йетип, бир йилда 610 миң көпәйгәнликини елан қилди. Даириләр бу санлиқ мәлуматни йеқинда өткүзгән «шинҗаңниң 2015‏-йиллиқ миллий иқтисади паалийәт әһвали» сәрләвһилик ахбарат йиғинида җакарлиған.

Йиғинда районниң нопус қурулмисидики бир йиллиқ омумий өзгириш әһвали һәққидә тәпсилий мәлумат берилгән болсиму, әмма әң муһим һалқа-һәр қайси милләтләрниң омумий нопус ичидики нисбити, туғулуш-өлүш вә әр-аял нисбити, шәһәр, базарлардики олтурақ нисбити һәмдә ишсизлиқ нисбити тилға елинмиған.

Мәзкур мәлумат, уйғур паалийәтчиләр хитайниң уйғур районида нопусни муқимлиқ мәсилиси, дәп қарап, уйғурларға қаттиқ пиланлиқ туғут сиясити йүргүзүш, уйғур нопусини қаттиқ контрол қилиш билән әйибләватқан мәзгилдә елан қилинди.

Д у қ баянатчиси дилшат ришитниң илгири сүрүшичә, хитай һөкүмити районда хитай аһалисиниң нопус җәһәттики үстүнлүкини сақлаш уйғурларниң сиясий тәләплиригә тақабил турушниң үнүмлүк чариси, дәп қарайдикән.

Уйғур аптоном районлуқ һөкүмәт даирилириниң йиғинда ашкарилишичә, районниң 2015‏-йилдики әркәк-аяллар нисбити аз кәм һәр 103 әркәккә 100 аял тоғра кәлгән. Шәһәр, базарлардики даим турушлуқ нопус омумий нопусниң 47.2 Пирсәнтини тәшкил қилған. Шәһәр, базарлардики ишсизлиқ нисбити болса 4% ичидә контрол қилинған.

Йиғинда йәнә, районниң 2015‏-йилдики бир йиллиқ туғулуш нисбити миңдә 15.59, өлүш нисбити миңдә 4.51, дәп елан қилинған.

Толуқ бәт