Америка ташқи ишлар министирлиқи уйғурлардики мәҗбурий нопус контроллуқини қайта тәкитлиди

Мухбиримиз әзиз
2020-08-19
Share

Уйғур диярида изчил давам қиливатқан зор паҗиәләрдин мәҗбурий нопус контроллуқи һәққидә көплигән дәлилләр ташқи дуняға мәлум болуватқанда америка ташқи ишлар министирлиқи хитай һөкүмитиниң бу һәқтики мунасивәтлик тәдбирлирини йәнә бир қетим кәскин тәнқидлиди. 18-Авғуст күни "фокс хәвәрлири" агентлиқиниң бу һәқтики зияритини қобул қилғанда америка ташқи ишлар министирлиқиниң баянатчиси морган ортагус ханим бу нуқтини алаһидә тәкитлиди.

Фокс агентлиқиниң бу һәқтики хәвиридә ейтилишичә, хитай һөкүмитиниң йиллардин буян һәрқайси дохтурханиларда уйғурларни нишан қилған мәҗбурий бала чүшүрүветиш қилмишлири тоғрисида сөз қилған морган ханим "биз бу қәбиһликләрниң ақивитидин бәкму әндишә қилмақтимиз," дегән. Шундақла радийомизниң бу һәқтики хәвиридин нәқил кәлтүрүп, дохтурханилардики "бовақларни вәзипә һесабида өлтүрүш" қилмишини әйиблигән.

Хитай һөкүмити һазирға қәдәр бу һәқтики барлиқ әйибләшләрни рәт қилип келиватқан болуп, техи йеқинда бу мәсилиләрни системилиқ вә пакитлиқ баян қилип кәлгән мутәхәссисләрдин адрян зенз қатарлиқларни "ялғанчилиқ" та әйиблигән иди.

Хитай һөкүмитиниң уйғурларниң нопусини контрол қилиш үчүн түрлүк қәбиһ васитиларни қоллинип келиватқанлиқи бирләшмә хәвәрләр агентлиқиниң тәкшүрүши җәрянидиму тағдәк пакитлар билән көпләп мәлум болған иди. Америка ташқи ишлар министирлиқиниң бу қилмишни йәнә бир қетим алаһидә тәкитлиши һәмдә өзлириниң бу мәсилини йеқиндин көзитиватқанлиқини билдүрүши, хәлқараниң бу һәқтики диққитини йәнә бир қетим бу мәсилигә қаратқан.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт