Xitay amanliq küchliri gu'angshida yene ikki Uyghurni étiwetken

Xitay amanliq küchliri jüme küni xitayning gu'angshi ju'angzu aptonom rayonida qolgha élishqa naraziliq bildürgen ikki Uyghurni étiwetken. Xitay axbarati, xitay amanliq küchliri étiwetken bu 2 Uyghurning gumanliq “Térrorchilar” ikenlikini ilgiri sürgen.

Biraq d u q bayanatchisi dilshat rishit, bu 2 Uyghur xitayning siyasiy, diniy bésimidin qéchip chet'elge chiqip kétishke mangghan “Musapirlar” ikenlikini bildürdi.

Bu, gu'angshida yéqinqi 3 ay ichide axbarat wasitilirige ashkarilan'ghan xitay amanliq küchlirining Uyghur musapirlirini 3-qétim oqqa tutup, ularni öltürüsh weqesi. Xitay amanliq küchliri bu yil 1‏-ayda wiyétnam chégrasida 2 Uyghurni étiwetken.

Bu qétimqi weqe gu'angshi ju'angzu aptonom rayonining dungshing shehiride yüz bergen. Xitay merkizi radi'o istansisining xewiride, sani mejhul bir qanche “Térrorchi unsur” bayqalghanliqini, saqchilar ularni qolgha élish jeryanida oq chiqarghanliqini bildürgen bolsimu, biraq qandaq amil saqchilarning oq chiqirishigha seweb bolghanliqini chüshendürmigen.

Dilshat rishit, Uyghurlarning qanunsiz qolgha élishqa naraziliq bildürgenliki üchün oqqa tutulghanliqini bildürdi. Uning körsitishiche, xitayning diniy bésimi, saqchilarning dindar Uyghurlargha tutqan mu'amilisi ularni chet'elge chiqip kétishke mejburlimaqtiken.