Уйғур дияридики 2022-йиллиқ оқуғучи қобул қилиш бәлгилимиси гуман қозғимақта

Мухбиримиз әзиз
2022-05-17
Share

Хитай һөкүмити башқурушидики “тәңритағ тори” ниң 17-майдики хәвиридә ейтилишичә, йеқинда уйғур аптоном районлуқ маарип назарити билән биңтуән системиси бирликтә уқтуруш тарқитип, 2022-йиллиқ мәҗбурийәт маарипи үчүн оқуғучи қобул қилиш бәлгилимисини елан қилған.

Хәвәрдә ейтилишичә, бу йеңи бәлгилимидә оқуш йешидики балиларниң мәктәпкә кириши үчүн мәктәп райони бойичә айрилған тәвәликтики кишиләр балилирини өзлиригә йеқин болған мәктәпләргә бәрсә болидиғанлиқи, шу арқилиқ һәқсиз болған мәҗбурийәт маарипини толуқ иҗра қилиш лазимлиқи тәкитләнгән. Шуниңдәк башланғуч вә толуқсиз оттура мәктәпләргә оқуғучи қобул қилишта мәвҗут болуватқан тизимлашқа даир бир қатар бәлгилимиләр вә мунасивәтлик имтиһанлар бикар қилинған. Бир синипта илгирики вақитлардикидәк һәддидин зиядә оқуғучи болуштәк әһвалға хатимә берип, оқуғучи саниниң башланғуч мәктәп синиплирида 45 тин ашмаслиқини, толуқсиз оттура мәктәпләрдә 50 тин ашмаслиқини бәлгилигән.

Бу қетимқи бәлгилимидә алаһидә орун алған йәнә бир нуқта ата-анисиға әгишип охшимиған мәктәп тәвәликигә көчүп кәлгән кишиләрниң балилири үчүн түзүлгән илгирики бир қатар бәлгилимиләр бикар қилинған. Шуниңдәк муқим нопуси болмиған, әмма “вақитлиқ олтурушлуқ гуваһнамиси” болғанларниң балилириму шу җайлардики мәктәпләргә кирип оқуса болидиғанлиқи бәлгиләнгән.

Хитай һөкүмитиниң түрлүк уқтурушлиридин мәлум болушичә, нөвәттә уйғур дияридики маарип системисида уйғур тилидики оқутуш пүтүнләй мәни қилинған болуп, оқутушта хитайчә қоллиниш йәслигичә омумлишип болған. Бу хил әһвалда хитай һөкүмитиниң “асанлиқ яритиш” намида оқуш йешидики балиларниң толуқ мәктәпкә беришини әмәлгә ашуруш һәркитини бәзиләр “маарип арқилиқ хитайлаштуруш” ни техиму үнүмлүк иҗра қилиш пиланиниң бир қисими икәнликини алға сүрмәктә икән. Йәнә келип уйғур гөдәклириниң милйонлап аилә җудалиқиниң қурбани болуватқанлиқи көпләп мәлум болуватқанда, бундақ бир сиясәтниң оттуриға чиқиши бу җәһәттики ассимилатсийә урунушлириниң йәнә бир ипадиси, дәпму қаралмақта икән. Йәнә бәзиләр болса вақитлиқ нопусқа игә кишиләрниң балилири һәққидики бәлгилимиләрни өткән йиллардин буян хитай һөкүмитиниң “ярдәм бериш” вә “чегра районда хизмәткә орунлишиш” намида тәшкиллик һалда уйғур дияриға көчүргән миңлиған хитай аққунлири үчүн түзүп чиққан “етибар бериш” сиясәтлириниң бир қисми икәнликини тәкитлимәктә икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт