Uyghur yash ösmürler partiyidin minnetdar bolush idiyisini turghuzushqa mejburlanmaqta

Muxbirimiz irade
2017-07-17
Share

Uyghur yash ösmür balilirining xitay hökümitining siyasiy teshwiqat heriketlirining nuqtiliq obékti qiliniwatqanliqi melum bolmaqta.

Bügün tengritagh torida "Balilarni partiyige minnetdarliq bildüridighan, partiyining gépini anglaydighan, partiyige egiship mangidighan qilip terbiyileyli" mawzusida élan qilin'ghan bir parche ochuq xet chet'ellerdiki közetküchilerning diqqitini qozghidi. Ochuq xette balilargha partiyini söyüsh, minnetdar bolush terbiyisini kichikidin bashlap bérishning muhimliqi eskertilgen bolup, ochuq xetning igisi turpan sheherlik ayallar birleshmisi partguruppisining mu'awin sékrétari gülshat exmet xétide "...Biz ishni özimizdin bashlap, balilirimizgha kichikidin tartipla partiyige minnetdarliq bildürüsh, partiyining gépini anglash, partiyige egiship méngish, toghra yolda méngish, balilirimizni herqaysi millet sawaqdashliri bilen ittipaq ötüsh, kichikidin tartip bille oynap, bille öginip, bille turmush kechürüshke yéteklishimiz kérek" dégen. 

Chet'ellerdiki Uyghur ziyaliyliri bolsa buni tenqid qilip, bu ochuq-ashkara halda balilargha "Ménge yuyush herikiti" élip bérishni teshebbus qilghanliq, dédi. 

Yéqinda tengritagh torida bérilgen bir xewerdin, yéngisheher nahiyisi aral yéziliq merkizi yeslidiki balilargha her heptide bir sa'ettin "Minnetdarliqni bildürüsh dersi" oqutulidighanliqi, bu derste yesli balilirigha partiye we hökümetning teshwiqati, "Qosh til ma'aripi" heqqide telim sözleydighanliqi melum bolghan. Uyghur  rayonining  re'isi shöhret zakirmu yéqinda yesli balilirigha yazghan bir ochuq xétide, balilarni "Partiye we weten'ge rehmet éytip, da'im minnetdarliqni bilidighan yaxshi balilardin bolunglar" dep chaqiriq qilghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.