Хитай даирилириниң үрүмчидә уйғурларға өй сетишни чәклигәнлики илгири сүрүлди

Мухбиримиз әркин
2018-11-30
Елхәт
Пикир
Share
Принт

Хитай даирилириниң уйғур елидә уйғурларға өй сетиш вә иҗаригә беришқа чәк қойғанлиқи илгири сүрүлди. Чәтәлдики «зимистан» намлиқ диний әркинлик ториниң хәвиридә 27‏-ноябир ашкарилинишичә, «шинҗаңдики уйғур вә туңган пуқралири өй сетиш, өй елиш яки йәр-мүлк иҗаригә елиш ишлирида пәвқуладдә еғир әһвалға дуч кәлмәктә» икән.

Хитай даирилириниң уйғурларниң өй елиш, өй сетишини қийинлаштурғанлиқиға даир хәвәрләр бурун тарқалған болсиму, бирақ бу тунҗи қетим хитай пуқралириниң уйғурларға өй сетиш чәкләнгәнликини илгири сүрүшидур.

Мәзкур торниң мухбири үрүмчидә олтурушлуқ ваң фамилилик бир хитай аялни зиярәт қилған. Хәвәрдә баян қилинишичә, бу аял өткән йили өзиниң үрүмчидики бир қанчә йүрүш өйини сетишқа чиқарған икән. Лекин шу райондики иҗтимаий районниң хадимлири дәрһал бу аял билән көрүшүп, униң өйини алғучи херидарлириниң әһвали сүрүштә қилған шундақла униңға өйини уйғурларға сетишқа болмайдиғанлиқи, әгәр уйғурға сатса өйни өткүзүп бериш-өткүзивелиш рәсмийитиниң беҗирилмәйдиғанлиқини билдүргән.

Хәвәрдә йәнә, мәзкур районда уйғурларниң өйини хитайдин башқа милләтләргә сетиши чәкләнгәнлики, бир уйғур өзиниң өйини бир уйғур херидарға саталмайдиғанлиқи билдүрүлгән.

Хәвәрдә дейилишичә, мәзкур тор бәтниң мухбири өйини сатмақчи болған бир уйғур аялни зиярәт қилған. Бу уйғур аялниң билдүрүшичә, у өйини сетиш үчүн бир өй-мүлк бедики билән көрүшкән. Бу өй-мүлк бедики униңға «сән уйғур болуш сүпитиң билән өйүңни хитайлардин башқа һечкимгә саталмайсән» дегән. Хәвәрдә, бу аялниң қериндишиниңму охшаш сәвәбтин бина өйини саталмиғанлиқи билдүрүлгән.

Хәвәрдә баян қилинишичә, бу әһвалдин туңганларму мустәсна әмәсикән. Хәвәрдә, бир туңган аялниң күйтүн шәһиридә олтурушлуқ қизиниң өйигә көчүп барғанлиқи, бу туңган аял тизимға алдурушқа керәклик пүтүн рәсмийәтләрни тәйяр қилған болсиму, лекин иҗтимаий район хадимлири униң туңган икәнлики сәвәблик олтуруш рухсити беришни рәт қилғанлиқи билдүрүлгән.

Пикирләр (0)
Share
Толуқ бәт