Xitay da'irilirining ürümchide Uyghurlargha öy sétishni chekligenliki ilgiri sürüldi

Muxbirimiz erkin
2018-11-30
Élxet
Pikir
Share
Print

Xitay da'irilirining Uyghur élide Uyghurlargha öy sétish we ijarige bérishqa chek qoyghanliqi ilgiri sürüldi. Chet'eldiki "Zimistan" namliq diniy erkinlik torining xewiride 27‏-noyabir ashkarilinishiche, "Shinjangdiki Uyghur we tunggan puqraliri öy sétish, öy élish yaki yer-mülk ijarige élish ishlirida pewqul'adde éghir ehwalgha duch kelmekte" iken.

Xitay da'irilirining Uyghurlarning öy élish, öy sétishini qiyinlashturghanliqigha da'ir xewerler burun tarqalghan bolsimu, biraq bu tunji qétim xitay puqralirining Uyghurlargha öy sétish cheklen'genlikini ilgiri sürüshidur.

Mezkur torning muxbiri ürümchide olturushluq wang famililik bir xitay ayalni ziyaret qilghan. Xewerde bayan qilinishiche, bu ayal ötken yili özining ürümchidiki bir qanche yürüsh öyini sétishqa chiqarghan iken. Lékin shu rayondiki ijtima'iy rayonning xadimliri derhal bu ayal bilen körüshüp, uning öyini alghuchi xéridarlirining ehwali sürüshte qilghan shundaqla uninggha öyini Uyghurlargha sétishqa bolmaydighanliqi, eger Uyghurgha satsa öyni ötküzüp bérish-ötküziwélish resmiyitining béjirilmeydighanliqini bildürgen.

Xewerde yene, mezkur rayonda Uyghurlarning öyini xitaydin bashqa milletlerge sétishi cheklen'genliki, bir Uyghur özining öyini bir Uyghur xéridargha satalmaydighanliqi bildürülgen.

Xewerde déyilishiche, mezkur tor betning muxbiri öyini satmaqchi bolghan bir Uyghur ayalni ziyaret qilghan. Bu Uyghur ayalning bildürüshiche, u öyini sétish üchün bir öy-mülk bédiki bilen körüshken. Bu öy-mülk bédiki uninggha "Sen Uyghur bolush süpiting bilen öyüngni xitaylardin bashqa héchkimge satalmaysen" dégen. Xewerde, bu ayalning qérindishiningmu oxshash sewebtin bina öyini satalmighanliqi bildürülgen.

Xewerde bayan qilinishiche, bu ehwaldin tungganlarmu mustesna emes'iken. Xewerde, bir tunggan ayalning küytün shehiride olturushluq qizining öyige köchüp barghanliqi, bu tunggan ayal tizimgha aldurushqa kéreklik pütün resmiyetlerni teyyar qilghan bolsimu, lékin ijtima'iy rayon xadimliri uning tunggan ikenliki seweblik olturush ruxsiti bérishni ret qilghanliqi bildürülgen.

Toluq bet