Uyghur pa'aliyetchiler washin'gtonda uyushturulghan diniy erkinlik heqqidiki bir qatar yighinlarda söz qilghan

Muxbirimiz qutlan
2018-07-23
Élxet
Pikir
Share
Print

Bügün, yeni 23-iyul küni washin'gtonda amérika dölet mejlisi, amérika dölet ishliri ministirliqi we kommunizm qurbanliri xatire fondi qatarliq orunlar uyushturghan diniy erkinlikke da'ir bir qatar muhim yighinlar bashlandi.

Dunya Uyghur qurultiyining re'isi dolqun eysa, adwokat nuri türkel qatarliq Uyghur pa'aliyetchiler bügün washin'gtonda bashlan'ghan bu bir qatar yighinlarda muhim sözligüchi süpitide otturigha chiqti.

Her yili 7-ayning 3-heptisi amérika qoshma shtatlirining ammiwi qanunida békitilgen "Munqerz eller heptiliki" dur. Bu heptilik amérikida 1959-yilidin buyan her yili ötküzülüp kélinmekte. Bu yil amérika dölet ishliri ministirliqi mezkur heptilik munasiwiti bilen paytext washin'gtonda 24-iyuldin 26-iyulghiche tunji qétimliq "Ministir derijilik diniy erkinlikni ilgiri sürüsh yighini" uyushturghan. Bügün yene amérika dölet mejlisining kéngesh palatasida xitaydiki diniy erkinlik mesilisi boyiche doklat bérish yighini ötküzülgen. Bash shtabi washin'gtondiki kommunizm qurbanliri xatire fondimu bu munasiwet bilen bügün asiya elliridiki diniy teqibler heqqide yighin uyushturghan.

Igilishimizche, bügün amérika dölet mejlisining kéngesh palatasida ötküzülgen "Xitaydiki diniy teqibler" namliq yighinda amérikidiki Uyghur pa'aliyetchi we adwokat nuri türkel ependi xitay hökümitining Uyghurlargha qaratqan diniy bésimliri we lagérlar mesilisi boyiche doklat bergen.

Dunya Uyghur qurultiyining re'isi dolqun eysa ependi kommunizm qurbanliri xatire fondining alahide teklipi bilen bügün washin'gtonda échilghan "Asiyadiki diniy teqibler" namliq yighinda échilish nutqi sözligen. Mezkur yighinning bügünki échilish murasimida dolqun eysa bilen bir qatarda yene sénator ted kruz, amérika dölet mejlisining jumhuriyetchiler partiyesidin bolghan ezasi keysiy mekmorris rodgérs xanim, amérika dölet mejlisining démokratlar partiyesidin bolghan ezasi elén lowéntal, muhajirettiki tibet siyasiy pa'aliyetchiliridin buchung séring qatarliqlarmu échilish nutqi sözligen. 

Bügün yene amérika dölet ishliri ministirliqi uyushturghan "Ministir derijilik diniy erkinlikni ilgiri sürüsh yighini" da amérikida yashawatqan sha'ir tahir hamut xitayning Uyghurlargha qaratqan diniy teqibliri heqqide guwahliq bergen.

Közetküchiler, bu hepte amérikida dawam qilidighan "Munqerz eller heptiliki" munasiwiti bilen uyushturulghan türlük yighinlarda Uyghur pa'aliyetchilerning arqa-arqidin otturigha chiqip söz élishi Uyghur mesilisining xelq'ara taratqular we siyasiy sehnilerde yenimu bir baldaq yuqiri kötürülüshige türtke bolidu, dep qarimaqta.

Toluq bet