Bezi taratqularda Uyghurlargha panahliq bérish mesilisi otturigha qoyulghan

Muxbirimiz jewlan
2021-02-12
Share

Yéqindin buyan bezi taratqularda "Xitayning Uyghurlargha yürgüzüp kéliwatqan jinayi qilmishi 'irqiy qirghinchiliq' dep békitilgendin kéyin, Uyghurlarning her qaysi döletlerdiki panahliq ishliri qandaq bolidu? Uyghurlarmu xongkongluqlargha oxshash panahliq bérish siyasitidin behrimen bolalamdu?" dégen mesile muhakime qilinishqa bashlighan.

11-Féwral SupChina torida "Uyghurlargha panahliq bérish" namliq bir maqale élan qilin'ghan bolup, "Uyghurlarni qoghdash toghra ish bolupla qalmay, belki u nahayiti yaxshi siyasiy istratégiye" dégen nuqta yorutup bérilgen.

Bu maqalide mundaq déyilgen: "Nahayiti roshenki, Uyghurlar tesewwur qilghusiz zulumgha uchridi. Emma amérika hökümitining eyibleshliri Uyghur we bashqa az sanliq milletlerge héchqandaq yardem bérelmidi. Xitayning meqsitimu shu idi. Uningdin bashqa, amérikaning yéqinda shinjangdiki bezi karxanilargha cheklime qoyushimu xitayning Uyghurlargha yürgüzüp kéliwatqan siyasitini özgertelmidi. Shunga baydén hökümiti ishni yaxshi qilip, Uyghurlarni derhal qanat astigha alsa bolidu. U memuriy buyruq élan qilip, hazir amérikada yashawatqan Uyghurlargha panahliq bérip, ularni amérikada menggülük turalaydighan salahiyetke érishtürüshi kérek. Bu Uyghurlarning sani 1500din 5000 ghiche bolup, ular xitayning her türlük tehditlirige duch kéliwatidu."

Bu maqalide körsitilishiche, 1989-yildiki "Tyen'enméin weqesi" din kéyin, 1992-yil bush hökümitining türtkisi bilen amérika dölet mejlisi "Xitay oqughuchilirini qoghdash qanuni" ni maqullighan bolup, 50 ming xitay oqughuchigha yéshil karta tarqitip bergen. Bügünki künde baydén hökümitimu amérika yéngi dölet mejlisini bu ishqa heriket qollinishqa seperwer qilishi mumkin iken. Yene Uyghurlarni chet ellik musapirlar behrimen bolidighan türlerdin behrimen qilsa, shundaqla ularni "Insanperwerlik nuqtisidin alahide köngül bölüshke tégishlik kishiler" dep békitse bolidiken, bundaq bolghanda chet elde turuwatqan Uyghurlarmu amérika puqrasi bolushqa iltimas sunalaydiken. Hazir chet elde yashawatqan köpinche Uyghurlarning ehwali amérikadiki Uyghurlarning ehwalidinmu qiyin we xeterlik iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet